जनकपुरधाम (धनुषा), १२ भदौ । रसुवाको भोटेकोशी क्षेत्रमा आएको भीषण बाढीपछि सम्पर्कविहीन रहेका मधेश प्रदेशका १० जना परिवार तथा आफन्तको सम्पर्कमा आएका छन् । उनीहरू सम्पर्कमा आएसँगै अझै ११६ जना सम्पर्कविहीन रहेको मधेश प्रदेश प्रहरीले जनाएको छ । प्रदेश प्रहरी कार्यालयका प्रवक्ता वरिष्ठ प्रहरी उपरीक्षक (एसएसपी) प्रभुप्रसाद ढकालका अनुसार यसअघि सम्पर्कविहीनको सूचीमा रहेका १० जना आफन्तको सम्पर्कमा आएका हुन् । उनीहरूको पहिचान भने प्रहरीले सार्वजनिक गरेको छैन ।
यसअघि प्रहरीले रसुवा बाढीपछि मधेश प्रदेशका १२० पुरुष, पाँच महिला र एक बालक गरी कुल १२६ जना सम्पर्कविहीन रहेको विवरण सार्वजनिक गरेको थियो । तीमध्ये सबैभन्दा बढी सप्तरीका ३१ जना रहेका थिए । प्रहरीको विवरणअनुसार सम्पर्कविहीन हुनेमा पर्साका २८, बाराका १९, रौतहटका १५, सर्लाही र महोत्तरीका १०–१०, सिरहाका ८ तथा धनुषाका ५ जना रहेका थिए ।
घरपरिवार तथा आफन्तले प्रहरीमा दिएको निवेदन र फोनमार्फत उपलब्ध गराएको विवरणका आधारमा सम्पर्कविहीन व्यक्तिहरूको प्रारम्भिक तथ्यांक तयार पारिएको एसएसपी ढकालले जानकारी दिए । प्रहरीका अनुसार सम्पर्कविहीनमध्ये ९१ जनाको बेपत्ता भएको स्थान ‘रसुवा’ मात्र उल्लेख गरिएको छ । अन्य व्यक्तिहरू रसुवाका विभिन्न जलविद्युत् आयोजना, नुवाकोटको बेत्रावती, त्रिशूली बजारलगायतका क्षेत्रमा काम वा व्यवसायका सिलसिलामा पुगेका थिए ।
सम्पर्कविहीनको विवरणमा केही व्यक्ति अपर त्रिशूली, त्रिशूली हाइड्रोपावर र मौलुङ हाइड्रोपावरलगायतका आयोजनासँग सम्बन्धित रहेको पनि प्रहरीले जनाएको छ । भोटेकोशीमा आएको विनाशकारी बाढीपछि विभिन्न क्षेत्रमा सम्पर्कविहीन भएका व्यक्तिहरूको खोजी तथा अवस्थाको पहिचान गर्ने काम जारी रहेको प्रहरीले जनाएको छ । परिवार तथा आफन्तबाट प्राप्त हुने नयाँ सूचनाका आधारमा सम्पर्कविहीनको विवरण निरन्तर अद्यावधिक गरिँदै आएको छ ।
प्रतिक्रिया दिनुहोस् !