वीरगंज (पर्सा), ११ भदौ । ठगीसम्बन्धी कसुरको मुद्दामा फरार रहेका वीरगंजका हरिनारायण रौनियारसहित चार जनालाई पक्राउ गर्न जिल्ला प्रहरी कार्यालय धनुषाले सम्बन्धित प्रहरी कार्यालयलाई पत्राचार गरेको छ । अरुणकुमार साहको जाहेरीका आधारमा नेपाल सरकार वादी र धनबहादुर बस्नेतसमेत प्रतिवादी रहेको ठगीसम्बन्धी मुद्दामा अनुसन्धानका क्रममा फरार रहेका चार जनालाई पक्राउ गर्न पत्राचार गरिएको हो ।
धनुषा जिल्ला अदालतबाट २०८३ साल असार २० गते पक्राउ पुर्जी जारी गर्न अनुमति प्राप्त भएपछि फरार प्रतिवादीहरूको खोजी तीव्र पारिएको प्रहरीले जनाएको छ । पक्राउका लागि खोजी गरिएका व्यक्तिमा सोलुखुम्बुको थुलुङ दूधकोशी गाउँपालिका–६ घर भई हाल काठमाडौंको बुद्धनगरमा बस्ने जेभी कम्पनीका सञ्चालक ३० वर्षीय धनबहादुर बस्नेत रहेका छन् ।
त्यस्तै, पर्साको वीरगंज महानगरपालिका–७ निवासी ५८ वर्षीय हरिनारायण रौनियार, सोही स्थानकी ३६ वर्षीया श्रुति रौनियार र ४५ वर्षीय सुमित रौनियारलाई पनि पक्राउ गरी अनुसन्धानका लागि उपस्थित गराउन भनिएको छ । जिल्ला प्रहरी कार्यालय धनुषाले उनीहरूका घरठेगाना तथा लुकिछिपी बस्न सक्ने सम्भावित स्थानमा खोजतलास गरी फेला परे तत्काल पक्राउ गरेर धनुषा प्रहरी कार्यालयमा पठाउन सम्बन्धित प्रहरी निकायलाई अनुरोध गरेको छ ।
प्रहरीका अनुसार पक्राउपछि चारै जनामाथि ठगीसम्बन्धी कसुरमा थप अनुसन्धान प्रक्रिया अगाडि बढाइनेछ ।
प्रतिक्रिया दिनुहोस् !