काठमाडौँ, ९ भदौ । नेपालमा बालिकामाथि हुने यौन हिंसाको अवस्था भयावह बन्दै गएको छ । नेपाल प्रहरीको तथ्याङ्कअनुसार पछिल्ला पाँच आर्थिक वर्षमा मात्रै १० वर्षमुनिका १ हजार २ सय १७ बालिका बलात्कारको सिकार भएका छन् । अर्थात्, औसतमा हरेक वर्ष करिब २५० अबोध बालिका बलात्कारमा परेको प्रहरी तथ्याङ्कले देखाउँछ ।
आर्थिक वर्ष २०७८/७९ मा १० वर्षमुनिका २६८ बालिका बलात्कारको सिकार भएका थिए । २०७९/८० मा २५९, २०८०/८१ मा २५२ र २०८१/८२ मा २१७ जनामा झरेको यो संख्या २०८२/८३ मा पुनः बढेर २२१ पुगेको छ । बालिकामाथि हुने बलात्कारका घटना प्रहरीको तथ्याङ्कमा देखिएभन्दा अझ धेरै हुनसक्ने सरोकारवालाको अनुमान छ ।
सामाजिक दबाब, पारिवारिक प्रतिष्ठाको डर तथा घटनालाई गाउँघरमै मिलापत्र गराउने प्रवृत्तिका कारण कतिपय घटना प्रहरीसम्म नपुग्ने गरेको बताइएको छ ।
प्रतिक्रिया दिनुहोस् !