मधेशमा तीन वर्षमा ६३० बलात्कारको घटना

वीरगंज (पर्सा), ९ भदौ । मधेश प्रदेशमा तीन बर्षको अवधिमा ६३० वटा बलात्कारको घटना भएको छ । यसले बार्षिक सदरदर २१० वटा बलात्कारको घटना भइरहेको देखिन्छ । अनौपचारिक क्षेत्र सेवा केन्द्र (इन्सेक) को नेपाल मानवअधिकार वर्ष पुस्तकअनुसार सन् २०२३ देखि २०२५ सम्म मधेश प्रदेशमा बलात्कारका ६३० घटनामा ३३१ बालिका र २९९ महिला पीडित भएका छन् ।

तथ्यांकअनुसार तीन वर्षको अवधिमा बालिका बलात्कारका सबैभन्दा बढी घटना सर्लाहीमा ६७ वटा भएका छन् । सप्तरीमा ५५, सिरहामा ५३, पर्सामा ४०, बारामा ३५, रौतहटमा २८, धनुषामा २७ र महोत्तरीमा २६ वटा घटना भएका छन् । वर्षगत रूपमा हेर्दा सन् २०२५ मा मधेशमा १०१ बालिका बलात्कारका घटना भएका छन् ।

सन् २०२४ मा १३० र सन् २०२३ मा १०० वटा घटना भएको इन्सेकको तथ्यांकमा उल्लेख छ । महिलातर्फ भने तीन वर्षमा सबैभन्दा बढी बलात्कारका घटना धनुषामा ९७ वटा भएका छन् । सिरहामा ४३, रौतहटमा ३२, सप्तरीमा २९, पर्सामा २७, महोत्तरीमा २५, सर्लाहीमा २४ र बारामा २२ वटा घटना भएका छन् ।