वीरगंज (पर्सा), ७ भदौ । जनमत पार्टी पर्साले जिल्लाका सबै वडामा संगठन विस्तारलाई तीव्रता दिँदै वडा अधिवेशन सम्पन्न गर्ने निर्णय गरेको छ । पार्टीको जिल्ला समन्वय समितिको बैठकले संगठनलाई वडा तहसम्म थप सुदृढ, व्यवस्थित र सक्रिय बनाउने उद्देश्यसहित प्रत्येक वडामा पर्यवेक्षक खटाउने निर्णय गरेको हो । वीरगंजस्थित माइस्थान अतिथि सदनमा जिल्ला अध्यक्ष ओमप्रकाश सरार्फको अध्यक्षतामा बसेको बैठकले पर्साका सबै वडामा संगठनात्मक गतिविधि प्रभावकारी रूपमा सञ्चालन गर्दै निर्धारित कार्ययोजनाअनुसार वडा अधिवेशन सम्पन्न गर्ने निर्णय गरेको जनाइएको छ ।
बैठकको मुख्य निर्णयअनुसार प्रत्येक वडामा पार्टीका तर्फबाट पर्यवेक्षक खटाइनेछ । सम्बन्धित वडामा खटिने पर्यवेक्षकले संगठन विस्तार, वडा अधिवेशनको तयारी, स्थानीय नेता–कार्यकर्ताबीच आवश्यक समन्वय तथा अधिवेशनलाई व्यवस्थित रूपमा सम्पन्न गराउन सहजीकरण गर्नेछन् । पार्टीले वडा तहलाई संगठनको आधारभूत संरचनाका रूपमा बलियो बनाउँदै आगामी राजनीतिक गतिविधिलाई थप प्रभावकारी बनाउने रणनीति अघि सारेको छ । बैठकमा संगठन विस्तारसँगै स्थानीय जनताका समस्या र स्थानीय मुद्दालाई प्राथमिकताका साथ उठाउने विषयमा समेत छलफल भएको थियो ।
जनमत पार्टी पर्साले वडा तहमा संगठन मजबुत भएपछि जनतासँग प्रत्यक्ष सम्पर्क बढाउने, स्थानीय समस्या पहिचान गर्ने र ती मुद्दालाई राजनीतिक रूपमा उठाउने तयारी गरेको छ । यसका लागि वडा अधिवेशनलाई केवल संगठनात्मक औपचारिकताका रूपमा नभई स्थानीय तहमा पार्टीको उपस्थिति बलियो बनाउने अवसरका रूपमा उपयोग गर्ने रणनीति लिइएको बैठकमा सहभागी नेताहरूले बताएका छन् । बैठकले निर्धारित कार्ययोजनालाई प्रभावकारी रूपमा कार्यान्वयन गर्दै सबै वडामा अधिवेशन सम्पन्न गर्ने र पार्टी संगठनलाई थप सक्रिय, अनुशासित, व्यवस्थित तथा जनमुखी बनाउने प्रतिबद्धता व्यक्त गरेको छ ।
बैठकमा पार्टीको राजनीतिक समितिका सदस्य सिपु तिवारी, केन्द्रीय सदस्यहरू अधिवक्ता हरिहर प्रसाद साह, श्यामशंकर चौरसिया, राजेश चौरसिया, सुजित चौरसिया र बबिता पिडासैनी, प्रदेश सदस्यहरू मोहम्मद अब्दुल हवारी र राजनारायण मिश्रलगायतको उपस्थिति थियो । त्यस्तै जिल्ला पदाधिकारीहरू नागेन्द्र गुप्ता, फुलेना कुशवाहा, राजुराज गिरी, सत्युग साह र जमिला खातुन, युवा जिल्ला अध्यक्ष मनोज साह, महिला अध्यक्ष अन्जना गुप्ता, विभिन्न पालिका अध्यक्ष तथा पार्टीका जिम्मेवार नेता–कार्यकर्ताहरू बैठकमा सहभागी थिए ।
पार्टी नेतृत्वले वडा तहमा संगठन विस्तार र अधिवेशनलाई प्रभावकारी बनाउन सबै नेता–कार्यकर्तालाई सक्रिय रूपमा परिचालन गर्ने जनाएको छ । वडा अधिवेशन सम्पन्न भएसँगै पर्साका सबै स्थानीय तहमा पार्टीको सांगठनिक संरचना थप व्यवस्थित हुने अपेक्षा गरिएको छ । जनताको समस्या र स्थानीय मुद्दालाई केन्द्रमा राखेर संगठन विस्तार गर्ने जनमतको रणनीतिले आगामी दिनमा पर्साको स्थानीय राजनीतिक गतिविधिमा पार्टीको सक्रियता अझ बढाउने संकेत गरेको छ ।
प्रतिक्रिया दिनुहोस् !