छपकैया तेक्वान्दो डोजाङमा १५ खेलाडीको बेल्ट ग्रेडिङ सम्पन्न

वीरगंज (पर्सा), २ साउन । छपकैया तेक्वान्दो डोजाङमा शनिबार आयोजित बेल्ट ग्रेडिङ (स्तरोन्नति) कार्यक्रममा विभिन्न तहका १५ जना खेलाडी सफलतापूर्वक स्तरोन्नति भएका छन् । नियमित प्रशिक्षण, अनुशासन र सीपको मूल्याङ्कनका आधारमा खेलाडीहरूलाई नयाँ बेल्ट प्रदान गरिएको हो । डोजाङका अध्यक्ष मन्सुर मोहम्मद मियाँको अध्यक्षतामा सम्पन्न कार्यक्रममा पर्सा जिल्ला तेक्वान्दो कार्यसमितिका अध्यक्ष गणेशमान श्रेष्ठ प्रमुख अतिथिका रूपमा सहभागी थिए ।

कार्यक्रममा खेलाडीहरूको उपलब्धिको प्रशंसा गर्दै तेक्वान्दोमार्फत अनुशासन, आत्मरक्षा र व्यक्तित्व विकासलाई थप सुदृढ बनाउनुपर्नेमा जोड दिइएको थियो । ग्रेडिङमा ९ जना खेलाडीले ह्वाइट (सेतो) बेल्ट, ३ जनाले हाफ ग्रीन (हरियो) बेल्ट, १ जनाले ग्रीन बेल्ट तथा २ जनाले ब्लु बेल्ट प्राप्त गरेका छन् । ह्वाइट बेल्ट प्राप्त गर्नेमा सानभी क्षेत्री, दिवस सापकोटा, नित्यम चौरसिया, एम. आहिल हुसेन, कृतिक कुमार जाटिया, आयुष्मा कुमारीसहित ९ जना रहेका छन् ।

त्यसैगरी एरिका दास, एरोन दास र विकास प्रजापति हाफ ग्रीन बेल्टमा, आहिल इब्राहिम ग्रीन बेल्टमा तथा सबना खातुन र अमन सर्राफ ब्लु बेल्टमा स्तरोन्नति भएका छन् । ग्रेडिङ परीक्षा नवल किशोर शर्मा, राजेन्द्रकुमार शाही, मन्जिल मियाँ हवारी र विक्रान्त डंगोल सम्मिलित ग्रेडिङ समितिले सञ्चालन गरेको थियो । समितिले खेलाडीहरूको प्राविधिक सीप, अनुशासन, आत्मविश्वास र दक्षताको मूल्याङ्कन गरी नतिजा सार्वजनिक गरेको हो ।

ग्रेडिङ समितिका सदस्य राजेन्द्रकुमार शाहीले तेक्वान्दोमा सफलता हासिल गर्न नियमित अभ्यास, अनुशासन र निरन्तर मेहनत अपरिहार्य हुने बताए । उनका अनुसार बेल्ट ग्रेडिङ केवल अर्को तहमा पुग्ने प्रक्रिया मात्र नभई खेलाडीको क्षमता, जिम्मेवारीबोध र आत्मविश्वास अभिवृद्धि गर्ने महत्वपूर्ण चरण हो । उनले आगामी दिनमा अझ समर्पित भएर प्रशिक्षणलाई निरन्तरता दिन सबै खेलाडीलाई आग्रह गरे ।

कार्यक्रमका अध्यक्ष मन्सुर मोहम्मद मियाँले छपकैया क्षेत्रमा तेक्वान्दोप्रति बालबालिका तथा युवाको आकर्षण दिनप्रतिदिन बढ्दै गएको उल्लेख गर्दै खेलले अनुशासन, आत्मरक्षा र सकारात्मक सोचको विकासमा महत्वपूर्ण भूमिका खेल्ने विश्वास व्यक्त गरे । उनले भविष्यमा पनि दक्ष तथा प्रतिस्पर्धी खेलाडी उत्पादन गर्दै तेक्वान्दो खेलको प्रवद्र्धन र विकासमा डोजाङले निरन्तर योगदान पुर्‍याउने प्रतिबद्धता व्यक्त गरे ।