वीरगंज (पर्सा), ८ असार । प्रेस काउन्सिल नेपालले पत्रकारिता क्षेत्रभित्र बढ्दै गइरहेका आचारसंहिता विपरीत गतिविधिप्रति गम्भीर ध्यानाकर्षण भएको जनाएको छ । काउन्सिलले सोमबार प्रेस विज्ञप्ति जारी गर्दै सञ्चारमाध्यम, पत्रकार तथा सामाजिक सञ्जाल प्रयोगकर्तालाई जिम्मेवार र मर्यादित व्यवहार अपनाउन आग्रह गरेको हो ।
काउन्सिलका अनुसार पछिल्लो समय केही सञ्चारमाध्यम, पत्रकार तथा सामाजिक सञ्जाल प्रयोगकर्ताबाट पत्रकारिता पेशाको आचारसंहिता र मर्यादाविपरीत गतिविधि हुने क्रम बढ्दो छ । विशेषगरी अनुमति बिना विभिन्न सरकारी तथा गैरसरकारी कार्यालय, शैक्षिक संस्था र कार्यक्रमस्थलमा प्रवेश गर्ने, अमर्यादित व्यवहार प्रदर्शन गर्ने, विवाद तथा हातपातका घटनालाई सामाजिक सञ्जालमा प्रचारप्रसार गर्ने तथा अश्लील र गैरजिम्मेवार सामग्रीलाई प्राथमिकता दिने प्रवृत्तिले पत्रकारिताको विश्वसनीयतामाथि प्रश्न उठाएको काउन्सिलको भनाइ छ ।
विज्ञप्तिमा केही अनलाइन सञ्चारमाध्यम तथा सामाजिक सञ्जाल प्लेटफर्महरूमा तथ्यहीन, भ्रामक, आपसी द्वेष फैलाउने तथा गालीगलौजपूर्ण सामग्री उत्पादन र प्रसारण गर्ने प्रवृत्ति बढ्दै गएको उल्लेख गरिएको छ । यस्ता सामग्रीहरूलाई दर्शक संख्या बढाउने र आर्थिक लाभ (मोनिटाइजेशन) केन्द्रित उद्देश्यले प्रसारण गरिनु पत्रकारिताको मूल मर्मविपरीत भएको काउन्सिलले जनाएको छ ।
प्रेस काउन्सिलले यस्ता गैरजिम्मेवार गतिविधिले पत्रकारिता क्षेत्रको गरिमा, विश्वसनीयता र स्थापित मर्यादामा नकारात्मक असर पारिरहेको भन्दै चिन्ता व्यक्त गरेको छ । पत्रकारिताको संवेदनशीलता, सत्यतथ्य, निष्पक्षता, सन्तुलन र जिम्मेवारीलाई केन्द्रमा राखेर समाचार सम्प्रेषण गर्नुपर्नेमा जोड दिइएको छ ।
काउन्सिलले सम्पूर्ण सञ्चारमाध्यम, आमपत्रकार, सञ्चारकर्मी तथा सामाजिक सञ्जाल प्रयोगकर्तालाई आचारसंहिताको दायराभित्र रही सत्य, तथ्य र जिम्मेवारीबोधका साथ सामग्री उत्पादन तथा प्रसारण गर्न आग्रह गरेको छ । सहप्रशासकीय अधिकृत तथा सूचना अधिकारी रामशरण बोहराद्वारा जारी विज्ञप्तिमा पत्रकारिताको विश्वसनीयता जोगाउन सबै सरोकारवालाको सक्रिय भूमिका आवश्यक रहेको उल्लेख गरिएको छ । 
प्रतिक्रिया दिनुहोस् !