इशनाथ (रौतहट), ८ असार । रौतहटको ईशनाथ नगरपालिकाको १३औँ नगरसभा सोमबार सम्पन्न भएको छ । नगर प्रमुख कौशल्या देवीको प्रमुख आतिथ्यता तथा उपनगर प्रमुखको विशेष उपस्थितिमा सम्पन्न नगरसभामा आगामी आर्थिक वर्षका नीति, कार्यक्रम तथा विकास योजनाबारे विस्तृत छलफल गरिएको हो । नगरसभामा प्रमुख प्रशासकीय अधिकृत महम्मद नवाज हुसेनसहित सम्पूर्ण वडाका वडाध्यक्ष, कार्यपालिका सदस्य, विभिन्न राजनीतिक दलका प्रतिनिधि, कर्मचारी, पत्रकार तथा अन्य सरोकारवाला व्यक्तिहरूको उल्लेखनीय सहभागिता रहेको थियो ।
सभामा शिक्षा, स्वास्थ्य, कृषि, सडक पूर्वाधार, खानेपानी, सरसफाइ तथा सामाजिक विकासका क्षेत्रलाई केन्द्रमा राखेर सहभागीहरूले आफ्ना सुझाव तथा धारणा प्रस्तुत गरेका थिए । नगरको समग्र विकासलाई प्रभावकारी बनाउने उद्देश्यले विभिन्न योजनामाथि गहन समीक्षा र छलफल गरिएको नगरपालिकाले जनाएको छ । कार्यक्रमलाई सम्बोधन गर्दै नगर प्रमुख कौशल्या देवीले नगरवासीको आवश्यकता, चाहना र अपेक्षाअनुसार विकास निर्माणका कार्यक्रमलाई प्राथमिकताका साथ अघि बढाइने बताइन् । उनले पारदर्शी, जवाफदेही र जनमुखी स्थानीय सरकार निर्माणतर्फ नगरपालिका निरन्तर प्रतिबद्ध रहेको उल्लेख गरिन् ।
नगरसभामा विभिन्न राजनीतिक दलका नेता, जनप्रतिनिधि, कर्मचारी, सञ्चारकर्मी तथा अन्य पदाधिकारीहरूको सक्रिय सहभागिता रहेको थियो । आपसी सहकार्य र सकारात्मक वातावरणबीच सम्पन्न नगरसभाले आगामी विकास योजनाको कार्यान्वयनका लागि महत्वपूर्ण मार्गनिर्देशन गरेको विश्वास नगरपालिकाले लिएको छ । 
प्रतिक्रिया दिनुहोस् !