जितपुरसिमरा (बारा), ३१ जेठ । निर्माण कार्यमा निरन्तर ढिलासुस्ती र सम्झौता अनुसारको जिम्मेवारी पूरा गर्न नसके पछि जीतपुरसिमरा उपमहानगरपालिकाले दुई महत्वपूर्ण भवन निर्माण योजनाको ठेक्का सम्झौता रद्द गरेको छ । उपमहानगरपालिकाले हद भएपछि पहिलो पटक निर्माण व्यवसायीविरुद्ध कडा कारवाइ गरिएको जनाएको छ ।
उपमहानगरपालिकाले वडा नं. ७ स्थित फकिरागिरी विद्यालय भवन तथा वडा नं. १२ को वडा कार्यालय भवन निर्माणको जिम्मा लिएको एन.के. कन्स्ट्रक्सन पर्सा सँगको सम्झौता औपचारिक रूपमा अन्त्य गरेको जनाएको छ । दुवै योजना आर्थिक वर्ष २०८१/०८२ मा सम्झौता भई कार्यान्वयनमा गएको भएपनि तोकिएको समयभित्र निर्माण सम्पन्न हुन नसकेपछि ठेक्का रद्द गर्ने निर्णय गरिएको हो ।
पूर्वाधार विकास शाखा प्रमुख अभयकान्त झाका अनुसार निर्माण कम्पनीलाई पटक–पटक मौखिक तथा लिखित रूपमा काम तीव्र बनाउन आग्रह गरिएको थियो । निर्माणको अवस्था सन्तोषजनक नभएपछि वैशाख २२ गते १५ दिने स्पष्टीकरण सहितको सूचना जारी गरिएकोमा, कम्पनीले कुनै ठोस कदम नचाले पछि सम्झौता रद्ध गरिएको हो । 
प्रतिक्रिया दिनुहोस् !