वीरगंज (पर्सा), २४ जेठ । मधेश प्रदेश सरकारको वन तथा वातावरण मन्त्रालयले नेपाली कांग्रेस पर्सा क्षेत्र नं. ४ का सचिव बलिष्टर अहमदलाई जिल्ला वन पैदावार आपूर्ति समिति पर्साको अध्यक्षमा नियुक्त गरेको छ । मन्त्रालयले जारी गरेको नियुक्तिपत्रअनुसार मन्त्रीस्तरबाट २०८३ जेठ १९ गते गरिएको निर्णयका आधारमा प्रदेश वन ऐन, २०७७ को दफा ९४ बमोजिम अहमदलाई उक्त जिम्मेवारी प्रदान गरिएको हो ।
वन तथा वातावरण मन्त्रालयका महाशाखा प्रमुख सूर्य प्रसाद मैनालीद्वारा हस्ताक्षरित पत्रमा अध्यक्षको भूमिकामा रहँदा निष्पक्ष, इमान्दार र उत्तरदायी ढंगले प्रचलित कानुनअनुसार कार्य सम्पादन गर्ने अपेक्षा व्यक्त गरिएको छ । साथै मन्त्रालयले नव नियुक्त अध्यक्ष अहमदलाई बधाई तथा सफल कार्यकालका लागि शुभकामना समेत दिएको छ ।
नेपाली कांग्रेस पर्सा क्षेत्र नं. ४ का सचिवका रूपमा सक्रिय राजनीतिक भूमिका निर्वाह गर्दै आएका अहमदको नियुक्तिसँगै जिल्ला वन पैदावार आपूर्ति समिति पर्साको नेतृत्वले वन पैदावारको संरक्षण, व्यवस्थापन तथा वितरण प्रणालीलाई थप व्यवस्थित र प्रभावकारी बनाउने अपेक्षा गरिएको छ । मन्त्रालयका अनुसार नियुक्तिपत्रको बोधार्थ प्रदेश वन निर्देशनालय जनकपुरधाम, डिभिजन वन कार्यालय पर्सा तथा जिल्ला वन पैदावार आपूर्ति समिति पर्सामा समेत पठाइएको छ । 
प्रतिक्रिया दिनुहोस् !