वीरगंज (पर्सा), १९ जेठ । स्वर्गीय राजा वीरेन्द्र शाहको स्मृतिमा वीरगंजमा श्रद्धाञ्जली सभा सम्पन्न भएको छ । राजभक्त देशभक्त केन्द्रीय कार्यालय वीरगञ्जको आयोजनामा वीरगञ्ज महानगरपालिका–७ स्थित हनुमान मन्दिर प्राङ्गणमा आयोजित कार्यक्रममा सहभागीहरूले स्वर्गीय राजा वीरेन्द्र शाहप्रति श्रद्धासुमन अर्पण गरेका थिए ।
नारायणहिटी राजदरबार हत्याकाण्डको स्मरणमा आयोजित श्रद्धाञ्जली सभा राजभक्त देशभक्तका केन्द्रीय अध्यक्ष दिपेन्द्र प्रसाद रौनियारको सभापतित्वमा सम्पन्न भएको थियो । कार्यक्रममा वक्ताहरूले नारायणहिटी राजदरबार हत्याकाण्डको सत्यतथ्य पूर्ण रूपमा सार्वजनिक हुनुपर्ने धारणा व्यक्त गर्दै घटनासम्बन्धी विषयमा निष्पक्ष छानबिन र न्यायको अपेक्षा गरेका थिए ।
उनीहरूले स्वर्गीय राजा वीरेन्द्र शाहको शासनकालमा शान्ति, स्थायित्व तथा जनहितका पक्षमा भएका कार्यहरूको समेत स्मरण गरेका थिए । सभामा पशुपति विक्रम शाह, महेन्द्रप्रसाद शाह, वीरेन्द्र थापा, रामनारायण शाह, जनकलाल शाह, जयनारायण गौरो, अनुराणा, रञ्जन कुमार, रोशनी शाह, भीष्मा यादवलगायत शुभेच्छुक तथा स्थानीय बासिन्दाहरूको उल्लेखनीय उपस्थिति रहेको आयोजकले जनाएको छ । कार्यक्रमको अन्त्यमा सहभागीहरूले स्वर्गीय राजा वीरेन्द्र शाहप्रति श्रद्धाञ्जली अर्पण गर्दै उहाँको योगदानको स्मरण गरेका थिए । 
प्रतिक्रिया दिनुहोस् !