वीरगंज (पर्सा), ६ जेठ । पोखराको चर्चित लिचीबारी भ्रष्टाचार प्रकरणमा थुनामा रहेका पूर्व सङ्घीय मामिला तथा सामान्य प्रशासन मन्त्री राजकुमार गुप्ता सर्वोच्च अदालतको आदेशपछि धरौटीमा रिहा हुने भएका छन् । काठमाडौंस्थित डिल्लीबजार कारागार मा रहेका गुप्तालाई सर्वोच्च अदालतले ५० लाख रुपैयाँ धरौटीमा छाड्न आदेश दिएको हो । इजलास अधिकृत उदय प्रकाश लिम्बुका अनुसार मंगलबार आदेश जारी भए पनि मिसिल बुधबार मात्रै विशेष अदालत पुगेपछि धरौटी प्रक्रिया अघि बढाइएको थियो ।
सर्वोच्च अदालतका न्यायाधीश शारङ्गा सुवेदी र सुनिल कुमार पोखरेल को संयुक्त इजलासले विशेष अदालतको पूर्व आदेश उल्ट्याउँदै धरौटीमा रिहा गर्न निर्देशन दिएको हो । अदालतको आदेशअनुसार बुधबार गुप्ताका परिवारले ५० लाख रुपैयाँ बराबरको बैंक ग्यारेन्टी बुझाइसकेका छन् । प्रक्रिया पूरा भएसँगै आजै रातिसम्म गुप्ता रिहा हुने सम्भावना रहेको बताइएको छ ।
पूर्वमन्त्री गुप्ताको पक्षबाट अधिवक्ता कृष्ण प्रसाद पोखरेल, अजयजंशकर झा, दिपेन्द्र झा र कुमार शिलवाल लगायतले बहस गरेका थिए भने सरकारको तर्फबाट सरकारी वकिल रामहरि शर्मा काफ्ले ले पैरवी गरेका थिए ।
यसअघि २०८२ पुस १६ गते विशेष अदालतका न्यायाधीश सुदर्शनदेव भट्ट, डिल्लीरत्न श्रेष्ठ र विदुर कोइराला सम्मिलित इजलासले गुप्तालाई थुनामै राखेर अनुसन्धान अगाडि बढाउन आदेश दिएको थियो । उक्त आदेशको करिब साढे पाँच महिनापछि गुप्ता धरौटीमा रिहा हुन लागेका हुन् । 
प्रतिक्रिया दिनुहोस् !