वीरगंज (पर्सा), १ जेठ । जिल्ला प्रशासन कार्यालय पर्सा अन्तर्गतको जिल्ला अनुगमन समितिको संयुक्त टोलीले मूल्य पारदर्शिता सप्ताह अभियान अन्तर्गत शुक्रबार वीरगंज महानगरपालिका का विभिन्न क्षेत्रमा सञ्चालित होटल तथा क्यान्टिनहरूमा आकस्मिक अनुगमन गरेको छ ।
अनुगमनका क्रममा जिल्ला प्रशासन कार्यालय पर्सा ले उपभोक्ता संरक्षण ऐन, २०७५ र उपभोक्ता संरक्षण नियमावली, २०७६ विपरीत गतिविधि गरेको पाइएपछि तीन व्यवसायीलाई कुल ७५ हजार रुपैयाँ जरिवाना गरिएको जनाएको छ ।
कार्यालयका अनुसार वीरगंज महानगरपालिका वडा नं. ११ स्थित तराई हस्पिटल क्यान्टिन का सञ्चालक दिपक शाहले उपभोक्ता संरक्षण ऐन, २०७५ को दफा १५ अनुसार गर्नुपर्ने व्यवस्था पालना नगरेको तथा दफा ३८ (ट) अनुसार कसुर गरेको ठहर गर्दै दफा ३९ (१) (घ) बमोजिम ५० हजार रुपैयाँ जरिवाना गरिएको हो ।
त्यसैगरी वडा नं. १३ मा सञ्चालित होटल शेखर थापा की सञ्चालक ज्योति मगरले ऐनको दफा १५ विपरीत कार्य गरेको तथा दफा ३८ (घ) अनुसार कसुर गरेको पाइएकाले दफा ३९ (१) (क) बमोजिम २० हजार रुपैयाँ जरिवाना तिराइएको प्रशासनले जनाएको छ ।
यस्तै, वडा नं. १३ कै चौधरी होटल की सञ्चालक उर्मिला महतोलाई पनि सोही ऐनअन्तर्गत ५ हजार रुपैयाँ जरिवाना गरिएको छ । त्यही क्षेत्रमा व्यवसाय सञ्चालन गर्दै आएकी अनु देवीलाई भने व्यवसाय सुधार गर्न सामान्य निर्देशन दिइएको अनुगमन टोलीले जनाएको छ ।
जिल्ला प्रशासन कार्यालय पर्सा ले उपभोक्ताको अधिकार संरक्षण, मूल्य पारदर्शिता कायम तथा बजार व्यवस्थापनलाई प्रभावकारी बनाउन यस्ता अनुगमन अभियानलाई आगामी दिनमा समेत निरन्तरता दिइने जनाएको छ । 
प्रतिक्रिया दिनुहोस् !