वीरगंज (पर्सा), ३१ वैशाख । वीरगंज भन्सार कार्यालय अन्तर्गत रहेको एकीकृत भन्सार जाँचचौकी (आईसीपी) मा भारततर्फबाट बिहानै मालवाहक सवारी साधन जाँचपास गरी नेपाल पठाउन भारतीय कस्टमले असहयोग गरेको गुनासो छ ।
सीमा नाकामा हुने अनौपचारिक कारोबार नियन्त्रण, भन्सार प्रणालीलाई छिटोछरितो बनाउने तथा आयात–निर्यातलाई सहजीकरण गर्ने उद्देश्यले भारत सरकारको सहयोगमा नेपाल र भारततर्फ समान संरचनासहित आईसीपी निर्माण गरिएको थियो । तर, सञ्चालनमा आएको वर्षौं बितिसक्दा पनि भारतीय पक्षले बिहानै मालवाहक गाडी नेपालतर्फ पठाउन नमानेको सरोकारवालाहरूको भनाइ छ ।
नेपालतर्फ आईसीपीको यार्ड व्यवस्थापन, पार्किङ तथा मालवाहक सवारी साधनको आवतजावत व्यवस्थापन गर्दै आएको टिआरएस हिमालयन लजिपार्क प्रालि का टर्मिनल प्रमुख गणेश प्रसाद घिमिरेका अनुसार दुई वर्षदेखि बिहानै गाडी पठाउन आग्रह गरिए पनि भारतीय कस्टमले बिहान ११ बजेअघि कहिल्यै गाडी नपठाएको बताए ।
यस विषयमा बीरगंज भन्सार कार्यालयका प्रमुख प्रशासक कृष्ण प्रसाद मैनालीले पनि भारतीय पक्षले कार्यान्वयनमा आनाकानी गरिरहेको बताएका छन् । 
प्रतिक्रिया दिनुहोस् !