जितपुरसिमरा (बारा), २४ वैशाख । बाराको जितपुरसिमरा उपमहानगरपालिकाले वातावरण संरक्षण र बढ्दो प्रदूषण नियन्त्रणका लागि फोहोर व्यवस्थापनमा कडाइ गर्ने भएको छ । उपमहानगरपालिकाले सार्वजनिक सूचना जारी गर्दै सडक, नाला, फुटपाथ तथा सार्वजनिक स्थलमा जथाभावी फोहोर फाल्ने व्यक्ति तथा संस्थामाथि कडा कानुनी कारबाही गरिने जनाएको हो ।
फोहोरमैला व्यवस्थापन ऐन २०६८ तथा उपमहानगरको फोहोरमैला व्यवस्थापन कार्यविधि २०७९ अनुसार अब सार्वजनिक स्थानमा फोहोर विसर्जन गर्न पूर्ण प्रतिबन्ध लगाइएको छ । उपमहानगरले कसुरको प्रकृति अनुसार जरिवानाको दायरा निर्धारण गर्दै अधिकतम ५० हजार रुपैयाँसम्म दण्ड सजाय हुन सक्ने स्पष्ट पारेको छ ।
सूचनाअनुसार सामान्य फोहोर जथाभावी फाल्ने व्यक्तिलाई पहिलो पटक पाँच सय रुपैयाँ जरिवाना गरिनेछ । एउटै गल्ती दोहोर्याएमा प्रत्येक पटक जरिवाना रकम दोब्बर हुने व्यवस्था गरिएको छ । सार्वजनिक स्थानमा चुरोटका ठुटा, गुट्खाका खोल वा अन्य साना फोहोर फाल्नेलाई समेत कारबाहीको दायरामा ल्याइएको छ । यस्ता कार्यमा संलग्न व्यक्तिलाई एक सय रुपैयाँ जरिवाना तोकिएको उपमहानगरले जनाएको छ ।
जनस्वास्थ्यमा गम्भीर असर पर्ने किसिमका फोहोर सडक, नदी वा खुला क्षेत्रमा फालेमा पाँच हजारदेखि ५० हजार रुपैयाँसम्म जरिवाना गरिने उल्लेख गरिएको छ । उद्योग तथा स्वास्थ्य संस्थाबाट निस्कने हानिकारक फोहोर व्यवस्थापनमा पनि उपमहानगरले कडा निगरानी गर्ने भएको छ । यदि कुनै उद्योग वा स्वास्थ्य संस्थाले विषादीयुक्त वा स्वास्थ्य जोखिमयुक्त फोहोर अव्यवस्थित रूपमा फालेको पाइएमा २५ हजार रुपैयाँसम्म जरिवाना गरिनुका साथै सम्बन्धित निकायमा अनुमति रद्दको सिफारिससमेत गरिने चेतावनी दिइएको छ ।
यसका अतिरिक्त अनुमति बिना सडक क्षेत्रमा निर्माण सामग्री थुपार्ने, सरसफाइमा अवरोध पुर्याउने वा सार्वजनिक स्थल फोहोर बनाउने व्यक्तिमाथि पनि आवश्यक कारबाही गरिने उपमहानगरले जनाएको छ । ‘सफा नगर, स्वस्थ नागरिक’ अभियानलाई प्रभावकारी बनाउन नगर प्रहरी, अनुगमन टोली र वडा कार्यालयहरूलाई सक्रिय रूपमा परिचालन गरिएको जनाइएको छ । उपमहानगरपालिकाले सम्पूर्ण नगरवासीलाई तोकिएको स्थान र समयमा मात्रै फोहोर व्यवस्थापन गर्न आग्रह गर्दै स्वच्छ, व्यवस्थित र सभ्य सहर निर्माणमा सहयोग गर्न अपिल गरेको छ । 
प्रतिक्रिया दिनुहोस् !