वीरगंज (पर्सा), २२ वैशाख । जिल्ला अदालत काठमाडौंले उद्योगी शेखर गोल्छालाई हिरासतमा राखेर थप अनुसन्धान गर्नुपर्ने माग अस्वीकार गरेको छ । अदालतको यस निर्णयसँगै केन्द्रीय अनुसन्धान ब्यूरो (सीआईबी)ले उनलाई हिरासतबाहिर राखेरै अनुसन्धान प्रक्रिया अघि बढाउनुपर्ने भएको छ ।
न्यायाधीश मोना सिंहको इजलासले यसअघि जारी गरिएको पक्राउ अनुमतिको म्याद थप नगर्ने आदेश दिएको हो । आदेशमा उल्लेख छ कि गोल्छालाई हिरासतमा राखेरै अनुसन्धान गर्नुपर्ने स्पष्ट आधार नदेखिएकाले मुलुकी फौजदारी कार्यविधि संहिता, २०७४ को दफा १४ (३) अनुसार म्याद थप गर्न नमिल्ने निष्कर्ष निकालिएको हो ।
यसअघि सोमबार सर्वोच्च अदालतले धरौटी वा जमानतको विकल्प उपलब्ध हुँदाहुँदै किन थुनामै राखेर अनुसन्धान गरिएको भन्ने विषयमा प्रश्न उठाएको थियो । यद्यपि, बीमासम्बन्धी कसुरबारे रिट निवेदनमा माग नभएकाले त्यस विषयमा टिप्पणी गर्न सर्वोच्चले अस्वीकार गरेको थियो ।
सर्वोच्चको उक्त आदेशपछि पनि सीआईबीले गोल्छालाई तत्काल रिहा गर्न मानेको थिएन । धितोपत्रसम्बन्धी कसुरबाट बीमासम्बन्धी कसुरतर्फ अनुसन्धान मोडिएको भन्दै उनलाई हिरासतमै राखिएको थियो । तर, बीमासम्बन्धी मुद्दामा म्याद थपका लागि अदालतमा प्रस्तुत गरिँदा जिल्ला अदालतले त्यसलाई अस्वीकार गर्दै उनलाई हिरासतमा नराख्ने निर्णय सुनाएको हो ।
यस निर्णयले अब गोल्छामाथिको अनुसन्धान हिरासतबाहिरबाटै अघि बढ्ने स्पष्ट भएको छ । 
प्रतिक्रिया दिनुहोस् !