वीरगंज (पर्सा), २१ वैशाख । वीरगंजस्थित गौतम माध्यमिक विद्यालय विरुद्ध शुल्क असुलीका नाममा विद्यार्थीलाई मानसिक दबाब दिएको गम्भीर आरोप सार्वजनिक भएको छ । अभिभावकहरूका अनुसार शुल्क नबुझाएकै कारण कक्षा १० र कक्षा ८ मा अध्ययनरत छात्राहरूलाई कक्षाकोठाबाट बाहिर निकालेर करिब दुई घण्टासम्म अपमानजनक अवस्था झेल्न बाध्य बनाइएको थियो ।
वीरगंज महानगरपालिका–१२ मुर्ली निवासी दिनेश कुमार गुप्ताले सोमबार महानगरपालिकाको शिक्षा महाशाखामा उजुरी दर्ता गर्दै विद्यालय प्रशासनविरुद्ध कारबाहीको माग गरेका छन् । उनका अनुसार कक्षा १० की अंकिता गुप्ता र कक्षा ८ की आराध्या गुप्तालाई शुल्क नतिरेको बहानामा कक्षाबाट निकालिएको थियो, जसले उनीहरूलाई मानसिक रूपमा असर पारेको छ ।
अभिभावक गुप्ताले बक्यौता शुल्क उठाउनका लागि विद्यार्थीमाथि कुनै पनि प्रकारको मानसिक यातना दिन नपाइने स्पष्ट व्यवस्था हुँदाहुँदै विद्यालयले नियमविपरीत व्यवहार गरेको आरोप लगाएका छन् । उनले यस कार्यलाई कानुनविपरीत भएको भन्दै सम्बन्धित निकायसँग आवश्यक कारबाही गर्न आग्रह गरेका छन् ।
घटनापछि केही अभिभावक विद्यालयमै पुगेर विरोध जनाएका थिए । एक अभिभावकका अनुसार दुई महिनाको अग्रिम शुल्क बुझाइसकेको अवस्थामा पनि एक महिनाको बाँकी देखाएर विद्यार्थीलाई दुई घण्टा कक्षाबाट बाहिर राखिएको थियो । ‘यस्तो व्यवहारले विद्यालयमा मानवता नै हराएको जस्तो देखिन्छ,’ उनले आक्रोश व्यक्त गरे ।
सरकारले एडमिशन शुल्क र वार्षिक शुल्क नलिन तथा शुल्क नबढाउन निर्देशन दिइसकेको भएपनि विद्यालयले त्यसको विपरीत असुली गरिरहेको आरोप समेत अभिभावकहरूले लगाएका छन् । यस्ता गतिविधिप्रति सम्बन्धित निकाय मौन बसेको भन्दै उनीहरूले गुनासो पोखेका छन् ।
यस विषयमा विद्यालय प्रशासनको धारणा बुझ्न प्रयास गर्दा विद्यालयको वेबसाइटमा उल्लेखित फोन नम्बरमा सम्पर्क हुन नसकेको जनाइएको छ । 
प्रतिक्रिया दिनुहोस् !