काठमाडौँ, २१ वैशाख । काठमाडौंस्थित माईतिघर मण्डलामा सोमबार राष्ट्रिय एकता दलले सीमाना क्षेत्रमा लागू गरिएको रु १०० को प्रावधान खारेजी तथा तथाकथित ‘डोजर आतंक’ अन्त्यको माग गर्दै प्रदर्शन गरेको छ । करिब २०० जनाको सहभागिता रहेको उक्त कार्यक्रममा कार्यकर्ता र नेताहरूले सरकारविरुद्ध चर्को नाराबाजी गर्दै असन्तुष्टि व्यक्त गरेका थिए ।
प्रदर्शनमा सहभागीहरूले सीमाना क्षेत्रमा गरिब नागरिकमाथि भइरहेको अन्याय, कडाइ तथा भेदभावपूर्ण व्यवहारको विरोध गरेका थिए । कार्यक्रम दलका केन्द्रीय अध्यक्ष विनय यादवको नेतृत्वमा सम्पन्न भएको थियो । साथै नेता तोयानाथ दहाल, कालानंद मिश्र र प्यारी तामाङ लगायतले पनि सम्बोधन गरेका थिए ।
अध्यक्ष यादवले सीमाना क्षेत्रमा लागू गरिएको रु १०० को प्रावधानले गरिबमाथि अन्याय भइरहेको आरोप लगाउँदै सरकारको नीति दोहोरो रहेको टिप्पणी गरे । उनका अनुसार धनीका लागि नियम फितलो बनाइन्छ भने गरिबका लागि कडा रूपमा लागू गरिन्छ । ‘एयरपोर्टबाट सुन र रक्सी सजिलै भित्रिन्छ, तर किसानले ल्याएको चामलसमेत जाँचिन्छ,’ उनले भने, ‘यो दोहोरो मापदण्ड अब सहिँदैन ।’
त्यसैगरी, उनले डोजर प्रयोग गरी जनताको घर भत्काउने कार्य तत्काल बन्द गर्न माग गर्दै पूर्वसूचना बिना गरिने कारबाहीलाई मानव अधिकारको ठाडो उल्लङ्घन बताएका थिए । उनले सरकारसँग सीमावर्ती नागरिकको अधिकार सुनिश्चित गर्न, किसानलाई आवश्यक मलखाद उपलब्ध गराउन र गरिबमाथिको दमन तुरुन्त रोक्न आग्रह गरे ।
प्रदर्शनका क्रममा सहभागीहरूले विभिन्न नारामार्फत आफ्ना मागहरू प्रस्तुत गरेका थिए । ‘सीमामा १०० को नियम हटाऊ, गरीबको हक अधिकार बचाऊ !’, ‘एयरपोर्टमा सुन–रक्सी छुट, गरिबको चामल किन जाँच कुट ?’, ‘पूर्व सूचना बिना डोजर बन्द गर, जनताको घरमा अन्याय अन्त गर !’ लगायतका नारा घन्किएका थिए । साथै ‘डोजर आतंक अब सहिँदैन’, ‘सीमानाका किसानलाई मल देऊ’, ‘नेपाल–भारत सीमामा अन्याय बन्द गर’ जस्ता सशक्त नाराले प्रदर्शनस्थल गुन्जिएको थियो ।
प्रदर्शन शान्तिपूर्ण रूपमा सम्पन्न भएको आयोजकले जनाएको छ । दलले आफ्ना मागहरू सम्बोधन नभए थप कडा आन्दोलन गर्ने चेतावनी समेत दिएको छ ।
प्रतिक्रिया दिनुहोस् !