वीरगंज (पर्सा), १० वैशाख । वीरगंज महानगरपालिकाले बजार क्षेत्रमा बढ्दो भाडा मनपरी र व्यवसायीमाथि भइरहेको दबाबप्रति कडा चेतावनी जारी गरेको छ । महानगरले एक सूचना प्रकाशित गर्दै त्रिभुवन राजपथ विस्तारका क्रममा विस्थापित व्यवसायीहरूलाई अवसरको रूपमा प्रयोग गरी अत्यधिक भाडा बढाउने, सटर खाली गराउन दबाब दिने तथा अवैध रूपमा रकम असुल्ने कार्य रोक्न निर्देशन दिएको हो ।
सूचनामा मुख्य सडक क्षेत्रबाट हटाइएका व्यवसायीहरू अन्यत्र सर्दा केही घरधनीहरूले अस्वाभाविक रूपमा भाडा बढाएको, पुराना व्यवसायीलाई हटाएर बढी भाडा दिने नयाँ व्यक्तिलाई सटर दिन खोजेको र सम्झौता विपरीत व्यवहार गरेको गुनासो प्राप्त भएको उल्लेख गरिएको छ । यस्ता गतिविधिले बजारमा असन्तुलन सिर्जना गर्नुका साथै साना तथा मझौला व्यवसायीलाई प्रत्यक्ष मारमा पारिरहेको महानगरको निष्कर्ष छ ।
महानगरपालिकाले घरधनी र व्यवसायीबीच भएको सम्झौता अनुसार नै भाडा निर्धारण गर्न र त्यसको पालना गर्न स्पष्ट निर्देशन दिएको छ । यदि कसैले सम्झौता विपरीत काम गरेको पाइएमा कानुनी कारबाही गरिने चेतावनी दिइएको छ । साथै, सबै घरधनीहरूलाई भाडासम्बन्धी सम्झौता प्रमाणित गरी महानगरको राजस्व व्यवस्थापन महाशाखामा अनिवार्य रूपमा पेश गर्न पनि निर्देशन दिइएको छ । महानगरले बजार व्यवस्थापनलाई व्यवस्थित र पारदर्शी बनाउन यस्तो कदम चालिएको जनाएको छ ।
महानगरले चेतावनी दिँदै यदि कसैले अवैध रूपमा भाडा असुली, दबाब सिर्जना वा गैरकानुनी गतिविधि गरेको पाइएमा प्रचलित कानुनअनुसार जरिवाना तथा अन्य कडा कारबाही गरिने स्पष्ट पारेको छ । सडक विस्तारसँगै उत्पन्न असहज परिस्थितिमा घरधनीहरूले सामाजिक जिम्मेवारी बुझ्नुपर्ने र व्यवसायीलाई सहयोगी भूमिका निर्वाह गर्नुपर्ने महानगरको आग्रह छ ।
प्रतिक्रिया दिनुहोस् !