वीरगंज (पर्सा), ६ वैशाख । वीरगंज महानगरपालिकाले बाइपास क्षेत्रको सडक विस्तार कार्य पनि तत्काल सुरु हुने जनाएको छ । महानगरपालिकाले आइतबार एक सूचना जारी गर्दै वडा नम्बर १२ र १३ को सिमानामा पर्ने नेपाल आयल निगम क्षेत्रीय कार्यालयदेखि मुलीं चोकसम्मको सडक विस्तार कार्य अघि बढाइएको जनाएको हो ।
महानगरपालिकाका अनुसार उक्त सडक खण्डको केन्द्र रेखाबाट दायाँ–बायाँ पाँच–पाँच मिटर गरी कुल १० मिटर सडक चौडा बनाउने योजना अन्तर्गत काम भइरहेको छ । नेपाल आयल निगम कार्यालयदेखि सबाह अन्सारीको घरसम्मको भागमा सडक विस्तार कार्य सम्पन्न भइसकेको छ भने बाँकी खण्डमा अब विस्तार गरिने जनाइएको छ ।
यसअघि मिति २०८१ माघ १३ गते नै सार्वजनिक सूचना जारी गरिएको भएपनि विभिन्न कारणले सडक विस्तार कार्य अवरुद्ध हुँदै आएको थियो । अहिले भने महानगरपालिकाले पुनः सूचना प्रकाशित गर्दै बाँकी क्षेत्रको अवरोध हटाउन आग्रह गरेको हो ।
महानगरपालिकाले जारी सूचनामा सबाह अन्सारीको घरदेखि मुलीं चोकसम्म सडकको दायरा भित्र पर्ने भवन तथा संरचनाहरू २४ घण्टाभित्र खाली गर्न सम्बन्धित सबैलाई निर्देशन दिएको छ । सोमबार दिउँसो ३ बजेसम्म तोकिएको समयभित्र संरचना हटाउनुपर्ने उल्लेख गरिएको छ ।
प्रमुख प्रशासन तथा व्यवस्थापन महाशाखा प्रमुख सुनिल कुमार कर्णले सडक विस्तार कार्यलाई प्रभावकारी रूपमा सम्पन्न गर्न सबै सरोकारवालालाई सहयोग गर्न आग्रह गरेका छन् । महानगरपालिकाले औद्योगिक तथा व्यापारिक शहर वीरगंजलाई व्यवस्थित र सुसंस्कृत बनाउने लक्ष्यअनुसार पूर्वाधार विकासलाई प्राथमिकतामा राखेको जनाएको छ ।
प्रतिक्रिया दिनुहोस् !