वीरगंज (पर्सा), ४ वैशाख । सरकारले पेट्रोलियम पदार्थको खपत घटाउने उद्देश्यले हप्तामा दुई दिन (शनिबार र आइतबार) सार्वजनिक बिदा दिने र शैक्षिक सत्र वैशाख १५ गतेबाट सुरु गर्ने निर्णय गरेपछि वीरगंजका विद्यालय सञ्चालकहरूले आपत्ति जनाएका छन् ।
नेशनल प्याब्सन, प्याब्सन र हिसान पर्साका प्रतिनिधिहरूले वीरगंज महानगरपालिकालाई संयुक्त ज्ञापनपत्र बुझाउँदै आपति जनाएका हुन् । पत्रमा यस्तो व्यवस्था लागू हुँदा शैक्षिक क्यालेण्डरमा गम्भीर असर पर्ने साथै वर्षमा करिब ४० दिन अतिरिक्त बिदा थपिने भएकोले पाठ्यक्रम समयमै पूरा गर्न कठिन हुने बताइएको छ ।
त्यस्तै, शैक्षिक सत्र सुरु हुने मिति वैशाख १ बाट १५ मा सारिँदा विद्यालय व्यवस्थापनमा थप दबाब पर्ने र समग्र शैक्षिक गतिविधि प्रभावित हुने उनीहरूको भनाइ छ । एक शैक्षिक सत्रमा कम्तीमा २२० कार्यदिन आवश्यक हुने व्यवस्था स्मरण गराउँदै ज्ञापनपत्रमा वर्तमान निर्णय त्यससँग असंगत भएको बताएको छ ।
स्थानीय तहको अधिकार क्षेत्रमा पर्ने विद्यालय शिक्षामा केन्द्र सरकारले हस्ताक्षेप गर्नु सोभनिय नभएको बन्दै वीरगंजका नीजि विद्यालय सञ्चालकहरूले वैशाख ४ गतेदेखि भर्ना प्रक्रिया सुरु गर्ने, त्यसपछिका दिनहरूमा शिक्षक प्रशिक्षण, अभिमुखीकरण र तयारी कार्यक्रम सञ्चालन गर्दै वैशाख ९ गतेदेखि नियमित कक्षा सञ्चालन गर्ने योजना रहेको पेस गरेको छ ।
प्रतिक्रिया दिनुहोस् !