वीरगंज (पर्सा), ४ वैशाख । स्वास्थ्य तथा जनसंख्या मन्त्रालयले अबदेखि अस्पतालहरूमा पनि हप्तामा दुईदिन सार्वजनिक बिदा लागू गर्ने निर्णय गरेको छ । शुक्रबार जारी सूचनाअनुसार राजपत्रमा चैत २२ गते प्रकाशित व्यवस्था कार्यान्वयनमा ल्याउँदै शनिबार र आइतबार सार्वजनिक बिदा दिने व्यवस्था सुरु गरिएको हो ।
यस निर्णयसँगै वीरगंजस्थित नारायणी अस्पतालमा पनि उक्त व्यवस्था लागू हुने भएको छ । यसअघि सरकारी कार्यालय र विद्यालयहरूमा मात्र दुई दिने बिदा लागू गरिएको भए पनि अस्पतालहरू भने यसबाट बाहिर राखिएका थिए ।
मन्त्रालयले स्वास्थ्यकर्मीहरूको हित र मनोबललाई ध्यानमा राख्दै यो निर्णय गरिएको स्पष्ट पारेको छ । यद्यपि, बिरामीको उपचारमा कुनै अवरोध नआओस् भन्ने उद्देश्यले अन्तरंग (इनडोर) तथा आकस्मिक सेवाहरू भने चौबिसै घण्टा निरन्तर सञ्चालनमा रहने जनाइएको छ । आइतबारका लागि पूर्वनिर्धारित शल्यक्रियाहरू बिरामीको सुविधा हेरी पुनः तालिका मिलाइने पनि मन्त्रालयले उल्लेख गरेको छ ।
साथै, बिदाका दिनमा पनि बिरामीहरूले आवश्यक सेवा सहज रूपमा पाउन सकून् भनेर अस्पतालहरूलाई अधिकतम सेवा उपलब्ध गराउन निर्देशन दिइएको छ । यदि कुनै सेवा उपलब्ध नभएमा नजिकको उपयुक्त अस्पतालमा सहज रेफर गर्ने र एम्बुलेन्स सेवा सधैँ तयारी अवस्थामा राख्ने व्यवस्था मिलाउन पनि मन्त्रालयले आग्रह गरेको छ ।
प्रतिक्रिया दिनुहोस् !