वीरगंज (पर्सा), ४ वैशाख । भारतबाट १०० रुपैयाँभन्दा बढी मूल्यका सामान ल्याउँदा भन्सार तिर्नुपर्ने प्रावधान खारेज गर्न जेनजी पर्साले माग गरेको छ । सीमावर्ती क्षेत्रमा लागू गरिएको उक्त नियमले सर्वसाधारणलाई सास्ती दिएको भन्दै संगठनले शुक्रबार पर्साका प्रमुख जिल्ला अधिकारी भोला दाहाललाई ध्यानाकर्षणपत्र बुझाएको हो ।
केही दिनयता वीरगंजसहितका नाकामा सुरक्षाकर्मी र भन्सार कर्मचारीले भारतीय बजारबाट घरायसी प्रयोजनका लागि किनमेल गरी फर्किएका नेपालीसँग १०० रुपैयाँभन्दा बढी मूल्यका सामानमा अनिवार्य भन्सार असुल्न थालेपछि विवाद चुलिएको छ । नयाँ सरकार गठनसँगै लागू गरिएको भनिएको यो व्यवस्था प्रति सर्वत्र असन्तुष्टि र विरोध देखिएको छ ।
जेनजी पर्साका अनुसार उक्त प्रावधानले पर्सा मात्र नभई समग्र मधेश क्षेत्रका सीमावासीलाई प्रत्यक्ष असर पारेको छ । नेपाल–भारतबीच दशकौँदेखि कायम सामाजिक, सांस्कृतिक र पारिवारिक सम्बन्ध (बेटी–रोटी) लाई समेत यसले प्रभावित बनाएको संगठनको भनाइ छ ।
संयोजक महादेवप्रसाद कुर्मीका अनुसार सीमावर्ती क्षेत्रमा दैनिक उपभोग्य सामग्री किनमेल गर्ने सर्वसाधारणमाथि कडाइ गर्दै कर असुल्नु अव्यवहारिक मात्र होइन, जनजीवनसँग प्रतिकूल पनि छ । उनले सुशासन र परिवर्तनको नारामा बनेको वर्तमान सरकारबाट सहजता अपेक्षा गरिएपनि सीमावर्ती मधेशका नागरिकमाथि विभेदपूर्ण व्यवहार भइरहेको आरोप लगाए ।
संगठनले तस्करी नियन्त्रण राज्यको दायित्व भएपनि त्यसको बहानामा सर्वसाधारणलाई दुःख दिनु उचित नहुने स्पष्ट पारेको छ । वीरगंजजस्तो खुला सीमामा संगठित तस्करी रोक्न ध्यान नदिई सामान्य नागरिकमाथि कर थोपर्नु स्वीकार्य नभएको जेनजी पर्साको धारणा छ । केही दिनयता भन्सारमा राजस्व चुहावट रोक्ने नाममा लागू गरिएको कडाइ तत्काल फिर्ता लिनुपर्ने माग गर्दै संगठनले चेतावनी दिएको छ । यदि यो व्यवस्था खारेज नगरिए वीरगंज नाका बन्दलगायतका आन्दोलनका कार्यक्रम घोषणा गर्न बाध्य हुने ।
प्रतिक्रिया दिनुहोस् !