वीरगंज (पर्सा), २८ चैत । मधेश प्रदेशमा वित्तीय साक्षरताको अभाव आर्थिक विकासको प्रमुख अवरोधका रूपमा देखिएको निष्कर्षसहित नेपाल राष्ट्र बैंक वीरगंजको आयोजनामा शनिबार एकदिने पत्रकार अनुशिक्षण कार्यक्रम सम्पन्न भएको छ । मकवानपुरको हेटौंडामा आयोजित कार्यक्रममा सहभागी विज्ञ तथा सरोकारवालाहरूले नागरिकमा वित्तीय ज्ञान अभिवृद्धि बिना दिगो आर्थिक समृद्धि सम्भव नहुने धारणा राखेका छन् ।
कार्यक्रममा वक्ताहरूले बैंकिङ पहुँच विस्तार भए पनि त्यसको प्रभावकारी उपयोग हुन नसक्नुको मुख्य कारण वित्तीय साक्षरताको कमी रहेको उल्लेख गरे । उनीहरूका अनुसार नागरिकमा बैंकिङ कारोबार गर्ने क्षमता नबढेसम्म आर्थिक गतिविधि गतिशील हुन सक्दैन । कार्यक्रमलाई सम्बोधन गर्दै सुशील पौडेलले वित्तीय ज्ञान अभावकै कारण बैंकहरूमा लगानीयोग्य रकम थुप्रिए पनि कर्जा माग अपेक्षित रूपमा बढ्न नसकेको बताए । बैंकिङ सेवा पुगेका क्षेत्रमा समेत ऋण लिन सक्ने क्षमता र आत्मविश्वास अभाव देखिएको उनको भनाइ थियो ।
उनले आधारभूत तहसम्म बैंकिङ पहुँच विस्तार, सुरक्षित कारोबार प्रवद्र्धन तथा जनचेतना अभिवृद्धिमा सञ्चारकर्मीहरूको भूमिका महत्वपूर्ण हुने औंल्याए । साथै मधेस प्रदेशमा पछिल्लो समय बैंकिङ अपराध बढ्दै गएको उल्लेख गर्दै वीरगंज कार्यालयमा दैनिक करिब ५४ वटा बैंकिङ स्क्यामसम्बन्धी उजुरी आउने गरेको जानकारी दिए ।
कार्यक्रममा वित्तीय अनुशासनका आधारभूत पक्षहरू समयमै बिल भुक्तानी, खर्च नियन्त्रण, नियमित बचत, स्वास्थ्य बीमा र आपतकालीन कोष निर्माणलाई व्यक्तिगत आर्थिक सुरक्षाका लागि अपरिहार्य उपायका रूपमा प्रस्तुत गरिएको थियो । यसैगरी नरेश सर्राफले पत्रकारहरूलाई वित्तीय साक्षरता सम्बन्धी विषयमा सक्रिय रूपमा लेखन गर्न आग्रह गर्दै जनचेतना फैलाउन सञ्चार माध्यमको भूमिका निर्णायक हुने बताए ।
अर्का वक्ता विनय केशरीले बैंकिङ कारोबारका प्राविधिक पक्षबारे जानकारी दिँदै नक्कली नोटबाट बच्न सतर्कता अपनाउन, मुद्रास्फीति र विनिमय दरलाई ध्यानमा राखेर खरिद निर्णय गर्न तथा अनलाइन कारोबार गर्दा विश्वसनीयता सुनिश्चित गर्न सुझाव दिए । कार्यक्रममा उपभोक्तालाई अनावश्यक खर्च नियन्त्रण, सेवा शुल्क तुलना, बैंक खाताको नियमित निगरानी तथा कागजातमा हस्ताक्षर गर्नुअघि पर्याप्त जानकारी लिनुपर्नेमा जोड दिइयो । साथै वस्तु खरिद गर्दा त्यसको स्रोत र वातावरणीय प्रभावसमेत विचार गर्नुपर्ने सन्देश दिइएको थियो ।
पर्सा, बारा, रौतहट, मकवानपुर र चितवनका करिब ९० जना पत्रकार तथा कर्मचारी सहभागी उक्त कार्यक्रममा बैंक र सञ्चारकर्मीबीच सहकार्य अझ सुदृढ हुने विश्वास व्यक्त गरिएको छ । 
प्रतिक्रिया दिनुहोस् !