वीरगंज (पर्सा), २२ चैत । सरकारले पेट्रोलियम पदार्थको आपूर्तिमा देखिएको समस्या व्यवस्थापन गर्न तथा इन्धन खपत घटाउने उद्देश्यले सातामा दुई दिन सार्वजनिक बिदा दिने निर्णय गरेको छ । आइतबार बसेको मन्त्रिपरिषद् बैठकले शनिबार र आइतबार दुवै दिन सरकारी कार्यालय र शैक्षिक संस्थामा बिदा दिने व्यवस्था लागू गर्ने निर्णय गरेको हो ।
सरकारका प्रवक्ता एवं शिक्षामन्त्री सस्मित पोखरेलका अनुसार यो निर्णय २३ चैतदेखि नै कार्यान्वयनमा आउनेछ। निर्णयअनुसार अब देशभरका सरकारी कार्यालयसँगै सबै शैक्षिक संस्थाहरू पनि हप्तामा दुई दिन बन्द रहनेछन् । यद्यपि सेवा प्रवाहमा असर नपरोस् भन्ने उद्देश्यले सरकारले कार्यालय समय भने परिमार्जन गरेको छ ।
त्यसैगरि शैक्षिक संस्थाबाहेकका सरकारी कार्यालयहरू बिहान ९ बजेदेखि साँझ ५ बजेसम्म सञ्चालन हुनेछन् । ‘शैक्षिक संस्थाबाहेक उल्लेखित कार्यालयहरूको कार्यालय समय ९ देखि ५ बजेसम्म कायम गरिएको छ,’ प्रवक्ता पोखरेलले जानकारी दिए ।
सरकारले इन्धन खपत व्यवस्थापन, यातायातको चाप न्यूनीकरण तथा सार्वजनिक सेवा प्रवाहलाई व्यवस्थित बनाउने लक्ष्यसहित यस्तो निर्णय लिएको जनाएको छ । दुई दिनको बिदा व्यवस्थाले पेट्रोलियम आपूर्ति सहज बनाउन सहयोग पुग्ने विश्वास गरिएको छ । साथै, नयाँ व्यवस्थाले नागरिकको दैनिक जीवनशैलीमा समेत परिवर्तन ल्याउने अपेक्षा सरकारको छ । 
प्रतिक्रिया दिनुहोस् !