वीरगंज (पर्सा), १७ चैत । जिल्ला प्रशासन कार्यालय पर्सामा सेवाग्राहीहरूले भोगिरहेका झन्झट र प्रशासनिक अड्चनलाई हटाउन नवनिर्वाचित सांसदहरूले सक्रिय चासो देखाएका छन् । पर्सा–१ का सांसद हरि पन्त र पर्सा–२ का सांसद सुशील साह कानुले कार्यालयमा अनुगमन गर्दै सेवा प्रवाहको अवस्था प्रत्यक्ष अध्ययन गरेका हुन् । अनुगमनको क्रममा सांसदहरूले कार्यालयमा सेवा लिन आएका नागरिकसँग प्रत्यक्ष संवाद गरेका थिए ।
धेरै सेवाग्राहीहरूले एउटै फाइलमा ‘तोक’ लगाउन र स्वीकृत गराउन विभिन्न कोठाहरू धाउनु पर्ने, साना कामका लागि समेत घण्टौं कुर्नु पर्ने र प्रशासनिक प्रक्रिया अत्यन्त झन्झटिलो रहेको गुनासो व्यक्त गरेका थिए । यसपछि सांसदहरूले प्रमुख जिल्ला अधिकारी भोला दाहालसँग भेट गरी कार्यालयको सेवा सुधार र प्रभावकारी बनाउन सकिने उपायबारे छलफल गरेका थिए ।
प्रजिअ दाहालले सेवाहरूलाई प्रविधिमैत्री र सरल बनाउने प्रयासहरू अघि बढाइरहेको जानकारी दिएका छन् । उनले कार्यालयको कार्यसम्पादन चुस्त बनाउन र बिचौलियामुक्त बनाउन ‘एकद्वार प्रणाली’ लागू गर्ने अवधारणाबारे समेत बताएका छन् । सांसद पन्त र साहले सरकारी कार्यालयमा नागरिकले भोग्नु पर्ने सास्ती लोकतन्त्रको उपहास भएको टिप्पणी गरेका छन् ।
उनीहरूले भने, ‘हाम्रो मुख्य उद्देश्य भनेको आम नागरिकले राज्यबाट पाउने सेवा सहज, छिटो र सम्मानजनक ढंगले पाउनु हो । प्रजिअले सुरु गरेका सुधारले समय बचत गर्नुका साथै जनताको अपेक्षा पूरा गर्नेछ भन्नेमा हामी आशावादी छौँ ।’ यस अनुगमनले कार्यालय सुधारमा सांसदहरूको सक्रियतासँगै सेवाग्राहीको अनुभव सहज र प्रभावकारी बनाउन दिशा प्रदान गरेको छ । 
प्रतिक्रिया दिनुहोस् !