वीरगंज (पर्सा), १५ चैत । पर्सा जिल्लामा नागरिकता वितरण प्रक्रिया आइतवार देखि थप सरल र सहज बनाइएको छ । अब सेवाग्राहीले एउटै कोठाबाट नागरिकता तथा राष्ट्रिय परिचयपत्र सम्बन्धी सम्पूर्ण सेवा पाउने व्यवस्था मिलाइएको प्रमुख जिल्ला अधिकारी भोला प्रसाद दाहलले बताएका छन् ।
जिल्ला प्रशासन कार्यालय पर्साले सेवा प्रवाहमा सुधार ल्याउँदै नागरिकको समय, श्रम र खर्च बचत गर्ने लक्ष्यसहित ‘वन डेस्क सिस्टम’ लागू गरेको जनाएको छ । यस प्रणाली अन्तर्गत नागरिकता सिफारिस, आवश्यक कागजात जाँच, नागरिकता वितरण तथा राष्ट्रिय परिचयपत्र दर्ता जस्ता सेवा एउटै स्थानबाट उपलब्ध गराउन सुरु गरिएको हो ।
यसअघि नागरिकता बनाउन विभिन्न कोठा तथा शाखा धाउनुपर्ने बाध्यता थियो । नयाँ व्यवस्थासँगै सेवाग्राहीले लामो समय लाइन बस्नुपर्ने समस्या कम भएको छ भने सेवा प्राप्ति पनि छिटो र व्यवस्थित भएको स्थानीयले बताएका छन् । सेवा प्रवाहलाई पारदर्शी, छिटो र नागरिकमैत्री बनाउन डिजिटल प्रविधिको समेत प्रयोग बढाइएको जिल्ला प्रशासन कार्यालय पर्साले जनाएको छ । 
प्रतिक्रिया दिनुहोस् !