वीरगंज (पर्सा), ३ चैत । पर्सा निर्वाच क्षेत्र नं. ३ का पूर्व सांसद तथा पूर्वमन्त्री राजकुमार गुप्ता र रञ्जिता श्रेष्ठ विरुद्धको भ्रष्टाचार सम्बन्धी मुद्दाको सुनुवाइ मंगलबार स्थगित भएको छ । मुद्दा कास्कीको लिचिबारी घुस प्रकरणसँग सम्बन्धित हो । गुप्तालाई पुर्पक्षका लागि थुनामा पठाउने विशेष अदालतको आदेशविरुद्ध उनले सर्वोच्च अदालतमा निवेदन दिएका थिए ।
सो निवेदनमाथि मंगलबार सर्वोच्च अदालतका न्यायाधीश हरिप्रसाद फुयाँल र श्रीकान्त पौडेलको संयुक्त इजलासमा सुनुवाइका लागि पेसी तोकिएको थियो । तर, गुप्ताका कानुन व्यवसायीले सुनुवाइ स्थगित गराएपछि सम्बन्धित अन्य दुई मुद्दाको सुनुवाइ पनि रोकिएको हो । यससँगै पूर्वमन्त्री रञ्जिता श्रेष्ठ तथा कास्की मालपोत कार्यालयका तत्कालीन प्रमुख रामचन्द्र अधिकारी विरुद्धको भ्रष्टाचार मुद्दाको सुनुवाइ पनि स्थगित भएको छ ।
विशेष अदालतले श्रेष्ठ र अधिकारीलाई धरौटीमा छाड्ने आदेश दिएको थियो । सो आदेश बदर गर्न माग गर्दै अख्तियार दुरुपयोग अनुसन्धान आयोग सर्वोच्च अदालत पुगेको छ । यसअघि अदालतले गुप्ताको निवेदनमा कैफियत प्रतिवेदन माग गर्दै थप अनुसन्धानको आदेश दिएको थियो । लिचिबारी घुस प्रकरणमा विशेष अदालतले गुप्तालाई थुनामा पठाउने आदेश जारी गरेको थियो ।
अख्तियारका अनुसार गुप्ताले मालपोत कार्यालयका प्रमुखको सरुवा रोक्न र भूमि आयोगमा सदस्य बनाइदिने भन्दै घरजग्गा व्यवसायीबाट ५३ लाख रुपैयाँ घुस लिएको आरोप छ । त्यस्तै गुप्ता र रञ्जिता श्रेष्ठले पदको दुरुपयोग गर्दै कार्य सुविधा प्रदान गरेको भन्दै थप २५ लाख रुपैयाँ घुस लिएको आरोप पनि छ ।
यद्यपि गुप्ताले आफूले कुनै घुस नलिएको र आफूमाथि लागेको आरोप झुटो भएको दाबी गर्दै आएका छन् । अदालतले भने तत्काल प्राप्त प्रमाणका आधारमा उनलाई निर्दोष मान्न नसकिने ठहर गरेको छ ।
प्रतिक्रिया दिनुहोस् !