वीरगंज (पर्सा), १६ फागुन । प्रतिनिधिसभा सदस्य निर्वाचनलाई स्वच्छ, निष्पक्ष र शान्तिपूर्ण वातावरणमा सम्पन्न गराउने उद्देश्यले जिल्ला प्रशासन कार्यालय पर्साले अत्यन्त जरुरी सूचना जारी गरेको छ । आगामी फागुन २१ गते हुने निर्वाचनलाई मध्यनजर गर्दै सुरक्षा व्यवस्था कडा पारिएको जनाइएको छ ।
प्रशासनद्वारा जारी सूचनाअनुसार फागुन १८ गते (२ मार्च २०२६) सोमबार राति १२ः०० बजेदेखि फागुन २१ गते (५ मार्च २०२६) राति १२ः०० बजेसम्म पर्सा जिल्लासँग जोडिएका सम्पूर्ण भारतीय सीमा नाका पूर्णरूपमा बन्द गरिने भएको छ । सीमा बन्द अवधिमा आवतजावत पूर्णतः रोक लगाइने र अत्यावश्यक बाहेक कुनै पनि गतिविधि सञ्चालन गर्न नपाइने स्पष्ट गरिएको छ ।
निर्वाचन आयोग तथा गृह मन्त्रालयबाट प्राप्त निर्देशन, जिल्ला सुरक्षा समितिको निर्णय र सर्वदलीय बैठकको सहमतिका आधारमा उक्त आदेश जारी गरिएको प्रशासनले जनाएको छ । आदेश उल्लंघन गरेमा प्रचलित कानूनबमोजिम कारबाही गरिने चेतावनीसमेत दिइएको छ ।
यसैबीच, निर्वाचन अवधिसँगै पर्ने होली तथा सम्वन्धित पर्व मनाउने सन्दर्भमा पनि विशेष कडाई गरिएको छ । सार्वजनिक स्थलमा भीडभाड गर्ने, हो–हल्ला गर्ने, मादक पदार्थ सेवन गरी सार्वजनिक मर्यादा र शान्ति भङ्ग गर्ने, जवरजस्ती रङ्ग दल्ने वा पानी फाल्ने जस्ता गतिविधि नगर्न प्रशासनले आग्रह गरेको छ ।
त्यस्तै, चोक चौराहा वा खुला स्थानमा मेला, सांगीतिक कार्यक्रम तथा भीड जम्मा हुने किसिमका गतिविधि गर्न निषेध गरिएको छ । धार्मिक तथा सांस्कृतिक परम्पराअनुसार आ–आफ्नो घरपरिवारभित्र मर्यादित रूपमा पर्व मनाउन प्रशासनले अनुरोध गरेको छ ।
निर्वाचनको सम्वेदनशीलतालाई ध्यानमा राख्दै सुरक्षा निकायहरू उच्च सतर्कतामा राखिएको जनाइएको छ । पर्सा प्रशासनले आम नागरिक, राजनीतिक दल तथा सरोकारवाला निकायलाई कानूनको पालना गर्न र निर्वाचनलाई शान्तिपूर्ण बनाउन सहयोग गर्न आह्वान गरेको छ । आगामी निर्वाचनलाई ध्यानमा राख्दै प्रशासनको यो निर्णयले जिल्लामा सुरक्षा व्यवस्था थप सुदृढ हुने विश्वास लिइएको छ । 
प्रतिक्रिया दिनुहोस् !