वीरगंज (पर्सा), २९ माघ । वीरगंज महानगरपालिका वडा नं. १ छपकैया स्थित जनता समाजवादी पार्टी (जसपा) को नयाँ पार्टी कार्यालय औपचारिक रूपमा सञ्चालनमा आएको छ । आगामी फागुन २१ गते हुने प्रतिनिधिसभा सदस्य निर्वाचनलाई लक्षित गर्दै प्रचारप्रसार अभियानका क्रममा आयोजित कार्यक्रमबीच उक्त कार्यालय उद्घाटन गरिएको हो ।
जसपाबाट पर्सा क्षेत्र नं. २ का प्रतिनिधिसभा सदस्य उम्मेदवार अशोक टेमानीले रिबन काटेर कार्यालय उद्घाटन गरेका थिए । कार्यक्रमको अवसरमा विभिन्न राजनीतिक दल परित्याग गरी १५० भन्दा बढी नेताकार्यकर्ता जसपामा प्रवेश गरेका छन् । नवप्रवेशीहरूलाई पूर्वमन्त्री तथा जसपाका नेता रमेश कुर्मी, जसपा नेतृ करिमा बेगम र उम्मेदवार टेमानीले अविर टिका लगाई स्वागत गरेका थिए ।
उद्घाटन समारोहमा जसपाका स्थानीय नेता कार्यकर्ता, समर्थक तथा छपकैया आसपासका बासिन्दाको उल्लेख्य उपस्थिति रहेको थियो । सहभागीहरूले नयाँ कार्यालय सञ्चालनसँगै पार्टीको संगठनात्मक गतिविधि थप सशक्त हुने अपेक्षा व्यक्त गरेका थिए ।
कार्यक्रमलाई सम्बोधन गर्दै उम्मेदवार टेमानीले पार्टी कार्यालय केवल प्रचारप्रसारको केन्द्र मात्र नभई जनताका समस्या, सुझाव र अपेक्षा सुन्ने साझा थलोका रूपमा प्रयोग गरिने बताए । उनले चुनावी अभियानलाई जनतामुखी बनाउँदै घरदैलो, भेटघाट र संवादलाई निरन्तरता दिने प्रतिबद्धता व्यक्त गरे । ‘यो कार्यालय जनताको आवाज सुन्ने र समाधानका लागि पहल गर्ने थलो हुनेछ,’ उनले भने ।
पूर्वमन्त्री रमेश कुर्मीले जसपाले सधैं सामाजिक न्याय, समावेशी विकास र जनअधिकारका मुद्दालाई प्राथमिकतामा राखेको उल्लेख गर्दै पर्सा क्षेत्र नं. २ मा पार्टीप्रति बढ्दो आकर्षण त्यसैको परिणाम भएको बताए । जसपा नेतृ करिमा बेगमले महिलाको सशक्तीकरण, शिक्षा र स्वास्थ्यका सवालमा पार्टीको स्पष्ट दृष्टिकोण रहेको उल्लेख गर्दै मतदातालाई परिवर्तनका पक्षमा उभिन आग्रह गरिन् ।
कार्यक्रममा पार्टी प्रवेश गर्नेहरूले जसपाको नीति, विचार र स्थानीय मुद्दाप्रतिको प्रतिबद्धताबाट प्रभावित भई पार्टी रोजेको बताएका थिए । उनीहरूले निर्वाचनमा सक्रिय भूमिका खेल्दै पार्टीलाई विजयतर्फ लैजान योगदान दिने प्रतिबद्धता जनाएका छन् ।
छपकैयामा कार्यालय सञ्चालन र ठूलो संख्यामा पार्टी प्रवेशले पर्सा क्षेत्र नं. २ मा चुनावी माहोल थप सक्रिय बनेको देखिएको छ । उम्मेदवार टेमानीले चुनावी प्रचारप्रसार अभियानलाई तीव्र बनाउँदै विभिन्न टोल–वस्तीमा भेटघाट कार्यक्रमलाई निरन्तरता दिएका छन् ।
जसपामा युवा, अनुभवी, शिक्षित तथा विकासप्रेमी नेतृत्वको रूपमा स्थापित हुँदै गएका टेमानीप्रति स्थानीय तहमा सकारात्मक चर्चा बढ्दै गएको पार्टी स्रोतको दाबी छ । बढ्दो जनसम्पर्क र संगठन विस्तारसँगै पर्सा क्षेत्र नं. २ मा जसपाको उपस्थितिलाई मतदाताले नजिकबाट नियालिरहेको देखिन्छ । पार्टी कार्यालय सञ्चालनसँगै संगठनात्मक बैठक, मतदाता संवाद र प्रचारप्रसारका कार्यक्रम नियमित रूपमा सञ्चालन गरिने जनाइएको छ ।
प्रतिक्रिया दिनुहोस् !