वीरगंज (पर्सा), २९ माघ । पूर्व खानेपानीमन्त्री तथा पर्सा निर्वाचन क्षेत्र नं. १ बाट दुई पटक प्रतिनिधिसभा सदस्यमा निर्वाचित नेकपा एमालेका उम्मेदवार प्रदीप यादवले आफ्नो राजनीतिक पहिचान भाषणभन्दा कामबाट बनाएको दाबी गरेका छन् । तीन पटक मन्त्री र दुई कार्यकाल सांसद रहँदा उनले पर्सा-१ मा पाँच दर्जनभन्दा बढी विकास आयोजना अघि बढाएको उनको सचिवालयले जनाएको छ । तीमध्ये धेरै योजना सम्पन्न भई सञ्चालनमा आइसकेका छन्, केही निर्माणाधीन छन् भने केही शिलान्यासपछि कार्यान्वयन प्रक्रियामा छन् ।
२०७४ र २०७९ को निर्वाचनमा विजयी भएका यादवले खानेपानी, सडक, नाला, विद्यालय, अस्पताल र दलित आवासल गायतका क्षेत्रमा करोडौं रुपैयाँ बराबरका योजना ल्याएको उनका स्वकीय सचिव हरेन्द्र साह बताउँछन् । ‘पर्सामा प्रदीप यादवको पहिचान भाषणले होइन, कामले बनेको हो । जनताको सुख दुःखमा उहाँ निरन्तर साथ रहनुहुन्छ, संकटमा अग्रपंक्तिमै देखिनुहुन्छ,’ साहले भने ।
वीरगंजमा खानेपानीको चरम अभाव हुँदा र हैजाको महामारी फैलिँदा यादव जनतामाझ पुगेर सक्रिय भएको सचिवालयको दाबी छ । वन तथा वातावरण, खानेपानी, र स्वास्थ्य तथा जनसंख्या मन्त्रालयको जिम्मेवारी सम्हाल्दा पनि उनले आफ्नो निर्वाचन क्षेत्रका समस्यालाई प्राथमिकतामा राखेको उल्लेख गरिन्छ । मन्त्री र सांसदको हैसियतमा रहँदा पर्सामा विकासको आधार तयार पार्ने जनप्रतिनिधिका रूपमा आफू स्थापित भएको यादवको दाबी छ ।
वीरगंजमा वर्षौंदेखि दोहोरिने खानेपानी संकटको दीर्घकालीन समाधानका लागि करिब साढे चार सय करोड रुपैयाँको खानेपानी आयोजना अघि बढाइएको छ । यससँगै सडक, ढलान, नाला, विद्यालय भवन तथा धार्मिक सांस्कृतिक पूर्वाधार निर्माणमा उल्लेखनीय बजेट विनियोजन भएको बताइन्छ ।
सडक पूर्वाधारतर्फ वीरगंज–१८ इनर्वादेखि भवानीपुर हुँदै ड्राइपोर्टसम्मको सडक स्तरोन्नतिका लागि ३ करोड रुपैयाँ छुट्याइएको थियो, जसले स्थानीय बासिन्दा मात्र होइन उद्योग व्यापारसँग जोडिएका सवारी साधनलाई समेत सहज बनाएको दाबी छ । वीरगंज–३१ सोलखपुर आसपास, वीरगंज–२२, मनियारी गाउँ पश्चिम, गढीमाई मन्दिर जोडिने सडक, वीरगंज–२१, तथा श्रीपुरस्थित नेपाल राष्ट्रिय विद्यापीठ माध्यमिक विद्यालय भवन निर्माणमा पनि ३–३ करोड रुपैयाँका योजना अघि बढेका छन् ।
ठूला योजनासँगै साना तर प्रभावकारी परियोजनामा पनि ध्यान दिइएको सचिवालय बताउँछ । वीरगंज–१४ पिपरामा १ करोड, वीरगंज–१५ भिस्वा त्रिशुल चोकदेखि ५० लाख, वीरगंज–१२ नेशनल ट्रेडिङदेखि रेडियो वीरगंज क्षेत्रसम्म ५० लाख, राधेमाई सडकमा ५० लाख, तथा वीरगंज–१३ नयाँ टोलको ईदगाह परिसरभित्र ६० लाख रुपैयाँको पूर्वाधार योजना ल्याइएको छ । यसबाहेक १५, २५ र ४० लाख रुपैयाँका दर्जनौं योजनाबाट विभिन्न वडामा सडक ढलान, नाला र आधारभूत पूर्वाधार निर्माण गरिएको उल्लेख छ ।
यादवको पहलमा वडा नं. ३१ प्रसोतीपुर–कोनिया–सोलखपुर–रामबन सडक, वडा नं. २१ इस्लामपुरदेखि जनता सडक, तथा वडा नं. २२ जगरनाथपुर आईसिपीदेखि पूर्वतर्फ सडक स्तरोन्नतिमा १–१ करोड रुपैयाँ विनियोजन भएको थियो । वीरगंज–१८ सूर्य मन्दिर पोखरी सौन्दर्यकरण र वीरगंज–१२ पारस साहको घरदेखि मनिर मियाँको घर हुँदै राजेन्द्र साहको घरसम्म ढलान सडक निर्माणका लागि पनि १–१ करोडका योजना अघि बढेका छन्, जसले धार्मिक र पर्यटकीय महत्व बढाएको दाबी छ ।
कोरोना महामारी, हैजाको प्रकोप र खानेपानी संकटका बेला समेत काठमाडौंमा नबसी आफू क्षेत्रमै खटिएको सचिवालयले स्मरण गराएको छ । ‘स्वास्थ्यको ख्याल नगरी संकटका बेला उहाँ जनतामाझ रहनुभयो, यो यहाँका बासिन्दाले आफ्नै आँखाले देखेका छन्,’ साहले बताए । पर्सा–१ मा प्रदीप यादवले संकटमा साथ र विकासमा परिणाम देखिने काममार्फत आफ्नो पहिचान स्थापित गरेको दाबी गरिएको छ ।
प्रतिक्रिया दिनुहोस् !