वीरगंज (पर्सा), २९ माघ । नेकपा (एमाले) का तर्फबाट पर्सा निर्वाचन क्षेत्र नं. १ मा प्रतिनिधिसभा सदस्य पदका उम्मेदवार तथा पूर्व खानेपानी मन्त्री प्रदीप यादवले फागुन २१ गते हुने निर्वाचनलाई लक्षित गर्दै घरदैलो र जनता दर्शन कार्यक्रमलाई तीव्र बनाएका छन् । बुधबार उनले वीरगंज महानगरपालिका-१४ का विभिन्न टोलमा पुगेर मतदातासँग प्रत्यक्ष भेटघाट तथा संवाद गरेका थिए ।
घरदैलोका क्रममा यादवले यसअघि पर्सा-१ बाट दुई पटक निर्वाचित हुँदा क्षेत्रको विकासका लागि गरिएका कामहरूको विवरण मतदातासमक्ष राखे । विशेषगरी गत वर्ष देखिएको खानेपानी समस्याको समाधानमा आफूले निर्वाह गरेको भूमिकाबारे उनले विस्तारमा चर्चा गरे। समस्या उत्पन्न भएको २४ घण्टाभित्रै आवश्यक निर्देशन दिइएको दाबी गर्दै उनले टोल–टोलमा डीप बोरिङ जडान गरिएकै कारण आज वीरगञ्जमा खानेपानी संकट अन्त्य भएको उल्लेख गरे ।
यादवले निर्वाचनपछि पनि जनताकै बीचमा रहेर सेवा गर्ने प्रतिबद्धता दोहोर्याए । ‘सांसद वा मन्त्री हुँदा पनि म तपाईंहरूको घरदैलोमै पुगेको छु,’ उनले भने, ‘सुख–दुःखमा साथ दिने मेरो अभ्यास निरन्तर रहनेछ ।’ उनले मतदातालाई सोचविचार गरेर निर्णय लिन आग्रह गर्दै केही उम्मेदवारहरू चुनावका बेला मात्र देखिने गरेको टिप्पणीसमेत गरे ।
अन्य दलका उम्मेदवारहरू मत माग्न आए उनीहरूसँग काम र क्षेत्रीय उपस्थितिबारे प्रश्न गर्न मतदातालाई उनले सुझाए । प्रत्यक्ष संवादमार्फत मतदाताका जिज्ञासा सुन्दै उनले आगामी योजनाबारे पनि जानकारी गराएका थिए । कार्यक्रममा वीरगंज-१४ का वडाध्यक्ष महबुब एलाही अन्सारी, पूर्व वडाध्यक्ष भरत प्रसाद कुर्मी तथा एमालेका नेता कार्यकर्ताहरूको उल्लेखनीय सहभागिता रहेको थियो ।
प्रतिक्रिया दिनुहोस् !