वीरगंज (पर्सा), २६ माघ । पर्सा निर्वाचन क्षेत्र नम्बर १ का प्रतिनिधिसभा सदस्य उम्मेदवार रामकिशोर सिंह (पराग)ले सोमबार वीरगंज महानगरपालिका वडा नम्बर ३२ अन्तर्गत पर्ने रामबन र तेढा गाउँमा घरदैलो कार्यक्रम सम्पन्न गरेका छन् । घरदैलो अभियानका क्रममा उम्मेदवार सिंहले स्थानीयवासी तथा युवाहरूसँग प्रत्यक्ष भेटघाट गर्दै उनीहरूका गुनासा, सुझाव र समस्याबारे ध्यानपूर्वक छलफल गरेका थिए ।
स्थानीयहरूले बस्ती व्यवस्थापन, नाला तथा सडक निर्माण, शिक्षा र स्वास्थ्य सेवामा देखिएका चुनौतीहरूबारे आफ्नो धारणा राखेका थिए । सो अवसरमा युवाहरूले रोजगारीको अभावका कारण केही युवाहरू लागुऔषधको चपेटामा परेको विषय उठाएका थिए । उक्त विषय गम्भीर रहेको उल्लेख गर्दै उम्मेदवार सिंहले आफू निर्वाचित भएलगत्तै युवाहरूका लागि रोजगारीका अवसर सिर्जना गर्ने, सीपमूलक तालिम सञ्चालन गर्ने र आत्मनिर्भर कार्यक्रममार्फत रोजगारीको बाटो खोल्ने प्रतिबद्धता व्यक्त गरेका थिए ।
कार्यक्रमका क्रममा स्थानीयवासीहरूले उज्यालो नेपाल पार्टीका अध्यक्ष कुलमान घिसिङलाई काम गर्ने व्यक्तित्वको रूपमा स्मरण गर्दै ‘तपाईं पनि जनताको हितमा काम गर्ने नेता बन्नुहोस्, हामी तपाईंको साथमा छौं’ भन्ने विश्वास व्यक्त गरेका थिए । घरदैलो कार्यक्रममा स्थानीय युवाहरूको उल्लेख्य सहभागिता देखिएको थियो भने उज्यालो नेपाल पार्टीप्रति जनसमर्थन क्रमशः बढ्दै गएको अनुभूति गरिएको छ ।
प्रतिक्रिया दिनुहोस् !