वीरगंज (पर्सा), २६ माघ । नेपाली कांग्रेस पर्सा निर्वाचन क्षेत्र नम्बर-४ का उम्मेदवार रमेश रिजालले सोमबार आफ्नो घरदैलो तथा मतदाता भेटघाट अभियानलाई निरन्तरता दिएका छन् । पूर्व मन्त्री र निर्वतमान सांसद समेत रहेका उम्मेदवार रिजालले जिराभावानी गाउँपालिका वडा नम्बर १ र २ मा पुगेर स्थानीय बासिन्दासँग प्रत्यक्ष संवाद गरेका हुन् ।
घरदैलो कार्यक्रममा स्थानीय बासिन्दाहरूले उम्मेदवार रिजाललाई भव्य स्वागत गरेका थिए । मतदाताहरूले आगामी फागुन २१ गते हुने प्रतिनिधि सभा निर्वाचनमा आफ्नो समर्थन कांग्रेसलाई रहने प्रतिबद्धता व्यक्त गर्दै पार्टीमा विश्वास कायम रहेको बताएका थिए ।
प्रत्यक्ष संवादका क्रममा उम्मेदवार रिजालले आफू सधैं युवा नेतृत्वको पक्षमा रहेको उल्लेख गर्दै विकास कार्यमा युवाको सक्रिय भूमिका अपरिहार्य रहेको बताए । उनले विगतमा पनि अधिकांश युवा नेतृत्वलाई अघि बढाएको र आगामी दिनमा पनि युवाहरूसँग हातेमालो गर्दै अघि बढ्ने प्रतिबद्धता व्यक्त गरे । ‘युवाको सक्रिय सहभागिता बिना समृद्ध र विकसित समाजको कल्पना गर्न सकिँदैन,’ उनले भने ।
घरदैलो कार्यक्रममा स्थानीय समस्या, आवश्यकताहरू र जनताको अपेक्षाबारे समेत छलफल गरिएको थियो। उम्मेदवार रिजालले शिक्षा, स्वास्थ्य, सडक र रोजगारी जस्ता क्षेत्रमा देखिएका चुनौतीहरूको समाधान गर्न प्रभावकारी पहल गर्ने र जनताको आवाज संसदसम्म पुर्याउने विश्वास दिलाए ।
कार्यक्रममा प्रदेशसभा सदस्य तथा वन तथा वातावरण मन्त्री शंकरप्रसाद चौधरी, कांग्रेस मधेश प्रदेशका महामन्त्री बृहस्पति कृष्णलाल श्रेष्ठ, पर्सा जिल्ला प्रवक्ता रमेश पाण्डे, सहसचिव नवीन सिंह, क्षेत्रीय सभापति श्रीकान्त प्रसाद यादव, नेता सहरुम राउत गद्दी लगायत कांग्रेसका विभिन्न तहका नेता तथा कार्यकर्ताको उल्लेखनीय उपस्थिति रहेको थियो ।
यस घरदैलो अभियानले उम्मेदवार रिजालको जनसंपर्क सशक्त बनाउने, क्षेत्रीय विकासको योजना प्रत्यक्ष मतदातासम्म पुर्याउने र युवामैत्री नीतिलाई प्रवद्र्धन गर्ने रणनीति प्रष्ट रुपमा प्रस्तुत गरेको छ । 
प्रतिक्रिया दिनुहोस् !