वीरगंज (पर्सा), २५ माघ । नेपाली कम्युनिष्ट पार्टी (नेकपा) पर्सा निर्वाचन क्षेत्र नम्बर-२ का उम्मेदवार मनोज चौधरीले सोमबार आफ्नो घरदैलो तथा मतदाता भेटघाट कार्यक्रमलाई निरन्तरता दिएका छन् । उम्मेदवार चौधरीले वीरगंज महानगरपालिका वडा नम्बर-२५, श्रीरिसिया क्षेत्रका स्थानीय बासिन्दासँग प्रत्यक्ष संवाद गर्दै क्षेत्रका समस्याहरू र जनजीवनसँग सम्बन्धित आवश्यकताहरूको जानकारी लिएका छन् ।
उनले घरदैलो अभियानलाई जनतासँग नजिक पुग्ने अवसरको रूपमा प्रयोग गर्दै आगामी प्रतिनिधि सभा निर्वाचनमा विश्वास र समर्थन जुटाउने लक्ष्य रहेको बताएका छन् । कार्यक्रममा नेकपाका केन्द्रिय सदस्य नगेन्द्र चौधरी, रामचन्द्र साह, बृजलाल पासवान, केन्द्रिय सल्लाहकार समिति सदस्य रामश्रय राम, नेता रामेश्वर मण्डल, दिपेन्द्र सिह पटेलसहितका दर्जनौं नेता तथा कार्यकर्ताको उल्लेखनीय उपस्थिति रहेको थियो ।
उम्मेदवार चौधरीले मतदातासँगको प्रत्यक्ष संवादमार्फत क्षेत्रका समस्याको अवलोकन गर्दै विकास र समृद्धिका लागि सक्रिय पहल गर्ने आफ्नो प्रतिबद्धता व्यक्त गरेका छन् । यस अवसरमा उनले स्थानीय आवश्यकतालाई प्राथमिकतामा राखेर शिक्षा, स्वास्थ्य, सडक र रोजगारी जस्ता क्षेत्रका सुधारका योजनामा आफू अग्रसर रहने जानकारी दिएका छन् ।
घरदैलो अभियानमार्फत चौधरीले मतदातासँगको विश्वास निर्माण गर्नुका साथै समुदायसँगको निकटता बढाउने र आगामी निर्वाचनमा सकारात्मक प्रभाव पार्ने उद्देश्य राखेको पार्टी स्रोतले जनाएको छ । यो कार्यक्रमले उम्मेदवार चौधरीको जनसंपर्क र क्षेत्रीय पहुँच विस्तारको रणनीतिलाई प्रभावकारी रूपमा प्रदर्शन गरेको स्थानीय नेताहरूले बताएका छन् ।
प्रतिक्रिया दिनुहोस् !