वीरगंज (पर्सा), २६ माघ । पर्सा क्षेत्र नम्बर १ बाट जनमत पार्टीका प्रतिनिधिसभा सदस्य उम्मेदवार ओमप्रकाश सर्राफले वीरगंज महानगरपालिका वडा नम्बर ३२ अन्तर्गत टेढा र रामवन क्षेत्रमा भेटघाट तथा संवाद कार्यक्रम सम्पन्न गरेका छन् । चुनावी प्रचारप्रसार अभियानअन्तर्गत आयोजित उक्त कार्यक्रममा स्थानीय बासिन्दासँग प्रत्यक्ष अन्तरक्रिया गर्दै उनले गाउँस्तरका समस्याबारे छलफल गरेका थिए ।
कार्यक्रमका क्रममा उम्मेदवार सर्राफले वीरगंजका ग्रामीण वडाहरू अझैपनि विकासका आधारभूत पूर्वाधारबाट वञ्चित रहेको उल्लेख गरे । सडक, खानेपानी, स्वास्थ्य, शिक्षा तथा रोजगारीजस्ता आवश्यक सेवाबाट स्थानीय बासिन्दा टाढा रहनु परेको भन्दै उनले यस अवस्थाप्रति गम्भीर चिन्ता व्यक्त गरे । विगतमा निर्वाचित जनप्रतिनिधिहरूले गाउँको अपेक्षा र विश्वासअनुसार काम नगरेको आरोप लगाउँदै उनले गाउँहरूलाई उपेक्षा गरिएको दाबी गरे ।
सरार्फले आफू निर्वाचित भएमा वडा नम्बर ३२ लगायत ग्रामीण क्षेत्रको समग्र विकास र समृद्धिका लागि विशेष विकास प्याकेज ल्याउने घोषणा गरे । स्थानीय आवश्यकताका आधारमा पूर्वाधार, शिक्षा, स्वास्थ्य र कृषि क्षेत्रलाई प्राथमिकतामा राखेर योजनाबद्ध ढङ्गले काम गर्ने प्रतिबद्धता उनले व्यक्त गरे । ग्रामीण बस्तीलाई विकासको मूल प्रवाहमा जोड्न जनमत पार्टीले स्पष्ट योजना तयार पारेको उनको भनाइ थियो ।
उनले देश र मधेशको समग्र समस्याको समाधानका लागि जनमत पार्टी र डा. सिके राउतसँग स्पष्ट दृष्टिकोण र दीर्घकालीन सोच रहेको दाबी गरे । यही कारणले आगामी निर्वाचनमा ‘हर्न’ चुनाव चिन्हमा मतदान गरी जनमत पार्टीलाई सशक्त बनाउन उनले मतदातासँग अपिल गरे । जनताको सहभागिता र समर्थनबाट मात्र विकास सम्भव हुने उल्लेख गर्दै उनले स्थानीयलाई परिवर्तनका लागि सक्रिय हुन आग्रह गरे ।
भेटघाट कार्यक्रममा विभिन्न स्थानीय नेता तथा कार्यकर्ताहरूको उल्लेख्य सहभागिता रहेको थियो । कार्यक्रममा डा. मनोज कुमार, नजमा खातुन, सिए देवराज, महादेव शर्मा, निराजन कुशवाहा, सहनवाज राकी, अजित सिंह, मन्जय शर्मा, सुमित सिंह, नागेन्द्र गुप्ता, हाजारी साह लगायतको उपस्थिति रहेको थियो । सहभागीहरूले उम्मेदवार सरार्फलाई समर्थन जनाउँदै गाउँ–गाउँमा जनमत पार्टीको सन्देश पुर्याउने प्रतिबद्धता व्यक्त गरेका थिए ।
स्थानीय बासिन्दाले पनि आफ्ना समस्या, अपेक्षा र सुझाव उम्मेदवारसमक्ष राखेका थिए । सर्राफले ती सबै विषयलाई गम्भीरतापूर्वक लिँदै निर्वाचित भएपछि प्राथमिकताका आधारमा समाधान गर्ने आश्वासन दिए । कार्यक्रमले स्थानीय स्तरमा चुनावी माहोल थप सक्रिय बनाएको सहभागीहरूले बताएका छन् ।
प्रतिक्रिया दिनुहोस् !