वीरगंज (पर्सा), २५ माघ । पर्सा क्षेत्र नं. ४ बाट नेकपा (माओवादी केन्द्र) का प्रतिनिधि सभा सदस्य पदका उम्मेदवार जयप्रकाश थारुको चुनावी अभियानलाई सशक्त बनाउन जगरनाथपुर गाउँपालिका वडा नं. ३ खलुचडीमा निर्वाचन प्रचार–प्रसार तथा परिचालन समिति गठन गरिएको छ । स्थानीय स्तरमा अभियानलाई व्यवस्थित र प्रभावकारी बनाउने उद्देश्यले शरीफ गद्दीको संयोजकत्वमा ३१ सदस्यीय समिति निर्माण गरिएको पार्टीले जनाएको छ ।
प्रचार–प्रसार समिति संयोजक गद्दीका अनुसार, आगामी फागुन २१ गते हुने निर्वाचनमा उम्मेदवार थारुलाई विजयी गराउने लक्ष्यका साथ समिति गठन गरिएको हो । समितिले घरदैलो, जनसम्पर्क, मतदाता भेटघाट र विभिन्न कार्यक्रममार्फत चुनावी गतिविधि तीव्र पार्ने योजना बनाएको जानकारी दिइएको छ ।
समिति गठन कार्यक्रममा नेकपाका केन्द्रीय सदस्य नागेन्द्र चौधरी, बालगोपाल थापा, गंगा खड्का, नेता बलिराम साह लगायतका वक्ताहरूले सम्बोधन गरेका थिए । वक्ताहरूले यस क्षेत्रको विकास, सामाजिक रूपान्तरण र जनमुखी नीतिका लागि नेकपाको नेतृत्व आवश्यक रहेको धारणा व्यक्त गरे ।
उनीहरूले पार्टीले सधैं जनताको पक्षमा उभिँदै समाजवादी परिवर्तनको अभियानलाई निरन्तर अघि बढाउँदै आएको उल्लेख गर्दै आगामी निर्वाचनमा जयप्रकाश थारुलाई विजयी गराउन सबैलाई सक्रियतापूर्वक जुट्न आग्रह गरे । कार्यक्रममा स्थानीय नेता–कार्यकर्ता तथा समर्थकहरूको उल्लेखनीय उपस्थिति रहेको थियो, जसले चुनावी माहोललाई थप उत्साहपूर्ण बनाएको देखिन्थ्यो ।
समिति गठनसँगै खलुचडी क्षेत्रका विभिन्न टोल र बस्तीमा चुनावी गतिविधि थप व्यवस्थित हुने अपेक्षा गरिएको छ । यसले उम्मेदवारको सन्देश घरघरमा पुर्याउँदै मतदातासँग प्रत्यक्ष सम्पर्क सुदृढ गर्ने विश्वास व्यक्त गरिएको छ ।
प्रतिक्रिया दिनुहोस् !