वीरगंज (पर्सा), २४ माघ । पर्सा निर्वाचन क्षेत्र नं. २ अन्तर्गत वीरगंज महानगरपालिकाका विभिन्न वडाहरूमा नेकपा एमालेको अगुवा कार्यकर्ता भेला तथा पार्टी प्रवेश कार्यक्रम उत्साहपूर्ण रूपमा सम्पन्न भएका छन् । पछिल्ला कार्यक्रमहरूले एमालेतर्फ आकर्षण बढ्दै गएको संकेत दिएका छन् ।
वीरगंज महानगरपालिका वडा नं. १७ अलौंमा वडा कमिटीको आयोजनामा सम्पन्न कार्यक्रममा जनता समाजवादी पार्टी (जसपा) का अकतर मियाँ पवरीयाको नेतृत्वमा एक सयभन्दा बढी व्यक्ति एमालेमा प्रवेश गरेका छन् । प्रवेश गर्नेहरूमा कनवर मियाँ मन्सुरी, राजवंशी साह कानु, उमेश सहनी, शिवपुजन साहलगायत रहेका छन् । त्यसैगरी नेपाली कम्युनिष्ट पार्टीका किशुनदेव यादवको नेतृत्वमा एक दर्जनभन्दा बढीले पनि एमाले रोजेको जानकारी वीरगञ्ज महानगर लेखा समिति संयोजक अजय साहले दिए ।
कार्यक्रमका सहभागीहरूले पर्सा–२ की एमाले उम्मेदवार रिमा कुमारी यादवलाई विजयी गराउने प्रतिबद्धता व्यक्त गर्दै यस क्षेत्रबाट विगतमा अपेक्षित विकास हुन नसकेको धारणा राखे । जेन–जी पुस्ताको चाहनाअनुसार एमालेले युवा तथा महिला उम्मेदवार अघि सारेको उल्लेख गर्दै वक्ताहरूले सबै मिलेर परिवर्तनका लागि एकजुट हुनुपर्नेमा जोड दिए ।
यसैबीच, नेकपा एमाले वीरगंज महानगर कमिटीको आयोजनामा केन्द्रीय उपमहासचिव तथा युवा नेता योगेश भट्टराईको प्रमुख आतिथ्यमा अर्को पार्टी प्रवेश कार्यक्रम सम्पन्न भएको छ । कार्यक्रममा ठाकुर राम बहुमुखी क्याम्पसका पूर्व सभापति तथा जसपा युवा नेता मुकेश द्विवेदी, वीरगंज वडा नं. ९ का पूर्व वडा अध्यक्ष मनोज कलवार, वडा नं. ३ का पूर्व वडा सदस्य तथा न्यायिक समितिका पूर्व सदस्य तुफैल अख्तरलगायतका नेताहरू एमालेमा आबद्ध भएका छन् । नवप्रवेशीहरूलाई भट्टराईले टीका र माला लगाएर स्वागत गरेका थिए ।
दुवै कार्यक्रममा एमालेका केन्द्रीय सदस्य एवं वीरगंज महानगरपालिकाका मेयर विजय कुमार सरावगी, मधेश प्रदेश उपाध्यक्ष तथा महानगर इन्चार्ज विचारी यादव, उम्मेदवार रिमा कुमारी यादव, कार्यवाहक अध्यक्ष इलयाकत अली, लेखा समिति संयोजक अजय साह, नेता मुकेश द्विवेदी, क्षेत्रीय अध्यक्ष मनोज कुशवाहा, वडा अध्यक्षहरू संजिव छतकुली र विजय कुर्मी, बहुदरमाई नगरपालिकाका मेयर सिंगासान साह कलवार लगायत स्थानीय नेता तथा कार्यकर्ताहरूको उल्लेखनीय उपस्थिति रहेको थियो ।
आयोजकका अनुसार यस्ता कार्यक्रमहरूले पार्टी संगठनलाई थप सुदृढ बनाउनुका साथै आगामी निर्वाचनमा एमाले एकजुट भएर अघि बढ्ने विश्वासलाई मजबुत बनाएको छ ।
प्रतिक्रिया दिनुहोस् !