वीरगंज (पर्सा), २३ माघ । वीरगंज महानगरपालिका वडा नं. १८ भवानीपुर–इनर्वा निवासी मधेश आन्दोलनका वीर शहिद धर्मराज सिंह राजपुतकी आमा कलावती देवी राजपुतीनले नेकपा एमाले पर्सा क्षेत्र नं. १ का उम्मेदवार प्रदीप यादवलाई विजय तिलक लगाउँदै जितको आशीर्वाद दिएकी छन् ।
शुक्रबार बिहान शहिद परिवारसँगको भेटघाटका क्रममा उम्मेदवार यादव राजपुत निवास पुगेका थिए । उक्त अवसरमा कलावती देवीले यादवलाई फूलमाला लगाइदिँदै, दोसल्ला ओढाएर र मिठाई खुवाउँदै निधारमा टीका लगाइ भावुक मुद्रामा विजयको शुभकामना व्यक्त गरिन् । भेटका क्रममा शहिदकी आमा कलावती देवीले उम्मेदवार यादवप्रति दृढ विश्वास व्यक्त गर्दै भनिन्, ‘धेरै नेता आए गए, तर हाम्रो पीडा र अवस्था साँचो अर्थमा बुझ्ने र साथ दिने व्यक्ति प्रदीप यादव नै हुन् ।’
शुक्रबार बिहानैदेखि वीरगंज महानगरपालिका वडा नं. १८ भवानीपुर र वडा नं. २२ मनियारीमा जनता दर्शन कार्यक्रममा व्यस्त रहेका यादवले शहिदकी आमासँग आत्मीय संवाद गरेका थिए । उनले शहिद धर्मराज सिंहले देखाएको मार्गलाई सदैव सम्झिरहने प्रतिबद्धता जनाउँदै भने, ‘म तपाईंको छोरा सरह हुँ । कुनै समस्या परे नहिचकिचाई सिधै मलाई सम्पर्क गर्नुस् ।’
यादवले शहिद परिवारको सुख दुःखमा सधैं साथ रहने र भविष्यमा पनि निरन्तर सहयोग गर्ने वाचा व्यक्त गरे । शहिद परिवारसँगको भेटपछि उनले शहिद आमाबाट प्राप्त विजय तिलकले आफूलाई अझ जिम्मेवार र उत्साहित बनाएको बताए । उनले आफू वाचा मात्र गर्ने नभई काम गरेर देखाउने नेता भएको दाबी गर्दै आगामी दिनमा पनि प्रतिवद्धताअनुसार कार्य गर्ने विश्वास व्यक्त गरे ।
प्रतिक्रिया दिनुहोस् !