वीरगंज (पर्सा), २१ माघ । प्रतिनिधिसभा सदस्य निर्वाचन नजिकिँदै गर्दा पर्सा निर्वाचन क्षेत्र नम्बर–३ मा नेकपा एमालेले आफ्नो संगठनात्मक गतिविधिलाई तीव्रता दिएको छ । फागुन २१ गते हुने निर्वाचनलाई केन्द्रित गर्दै एमालेले आउँदो शनिबार पटेर्वा सुगौली गाउँपालिकास्थित श्री बनसपति गाद्दीमाई मन्दिर परिसरमा बृहत कार्यकर्ता भेटघाट कार्यक्रम तय गरेको छ ।
उक्त कार्यक्रममा नेकपा एमाले केन्द्रीय कमिटीका उपमहासचिव तथा पूर्वमन्त्री योगेश भट्टराई प्रमुख अतिथिका रूपमा सहभागी हुने कार्यक्रम रहेको छ । भट्टराई एमालेका तर्फबाट पर्सा–३ का प्रतिनिधिसभा सदस्य उम्मेदवार रुपेश पाण्डेको चुनावी अभियानलाई थप सशक्त बनाउन पर्सा आउने जनाइएको छ ।
आयोजकका अनुसार यस कार्यक्रमलाई पर्सा–३ मा एमालेको चुनावी अभियानको महत्वपूर्ण मोडका रूपमा लिइएको छ । कार्यक्रममार्फत संगठन सुदृढीकरण, कार्यकर्ताबीच समन्वय र एकता अभिवृद्धि गर्ने तथा निर्वाचन अभियानलाई अझ प्रभावकारी बनाउने लक्ष्य राखिएको छ ।
यस अवसरमा घरदैलो अभियानलाई थप आक्रामक बनाउने रणनीति, विपक्षीहरूले फैलाएको भ्रमलाई चिर्ने उपाय तथा चुनावी रणनीतिबारे विस्तृत छलफल गरिने जानकारी आयोजकहरूले दिएका छन् ।
कार्यक्रमलाई सम्बोधन गर्दै उपमहासचिव भट्टराईले देशको स्थायित्व, विकास र समृद्धिका लागि एमालेको विजय अपरिहार्य रहेको सन्देश दिने तयारी रहेको छ । साथै पर्सा–३ लाई पार्टीको बलियो आधार क्षेत्रका रूपमा स्थापित गर्न कार्यकर्तालाई स्पष्ट कार्यदिशा र चुनावी मार्गदर्शन प्रदान गरिने बताइएको छ ।
उक्त कार्यक्रममा केन्द्र, प्रदेश, जिल्ला तथा स्थानीय तहका नेता–कार्यकर्ता, जनप्रतिनिधि र संगठनका प्रतिनिधिहरूको उल्लेखनीय सहभागिता रहने अपेक्षा गरिएको छ । एमाले नेतृत्वले कार्यकर्ताको उत्साहजनक उपस्थितिले पर्सा–३ को चुनावी माहोल अझ तातिने विश्वास व्यक्त गरेको छ ।
यस कार्यक्रमलाई आगामी निर्वाचनका लागि एमालेको शक्ति प्रदर्शन र एकताबद्ध अभियानको घोषणाका रूपमा समेत हेरिएको छ ।
प्रतिक्रिया दिनुहोस् !