वीरगंज (पर्सा), २० माघ । फागुन २१ गते हुने प्रतिनिधिसभा सदस्य निर्वाचनलाई लक्षित गर्दै जनमत पार्टीका तर्फबाट पर्सा क्षेत्र नम्बर–१ का उम्मेदवार ओमप्रकाश सर्राफले आफ्नो चुनावी प्रचारप्रसार अभियानलाई भावनात्मक र ऐतिहासिक सन्दर्भसँग जोड्दै अघि बढाएका छन् । सोही क्रममा उनले वीरगंज महानगरपालिका वडा नम्बर–१८ इनर्वामा पुगेर मधेश आन्दोलनका वीर शहीद धर्मराज सिंहकी पूजनीय आमासँग भेटघाट गरेका छन् ।
भेटका क्रममा सर्राफले शहीद धर्मराज सिंहसहित मधेश आन्दोलनका सम्पूर्ण शहीदहरूको बलिदानलाई स्मरण गर्दै उनीहरूको सपना साकार पार्न जीवनभर संघर्ष गर्ने प्रतिज्ञा व्यक्त गरे । उनले आफूले उम्मेदवारी दिनुको मुख्य उद्देश्य नै मधेश आन्दोलनका एजेण्डा जोगाउनु, शहीदको बलिदानीबाट प्राप्त उपलब्धिको रक्षा गर्नु र त्यसलाई संस्थागत रूप दिनु रहेको स्पष्ट पारे ।
सर्राफले शहीद परिवारसँगको भेटलाई आफ्नो राजनीतिक यात्राको नैतिक आधार मानेको बताए । ‘मधेश आन्दोलनका शहीदहरूले दिएको बलिदानले हामीलाई अधिकार, पहिचान र आत्मसम्मानको मार्ग देखाएको छ । ती उपलब्धिहरूको रक्षा र विस्तारका लागि म प्रतिबद्ध छु,’ उनले भने ।
शहीदकी आमासँग आशीर्वाद ग्रहण गर्दै उनले व्यक्त गरेको भावनाप्रति आफूले उच्च सम्मान व्यक्त गरेको जनाए । सर्राफका अनुसार शहीद परिवारको पीडा, त्याग र आशा अपेक्षाले आफूलाई अझ जिम्मेवार बनाएको छ ।
चुनावी अभियानका क्रममा शहीद परिवारसँगको यो भेटले सर्राफको प्रचारप्रसारलाई ऐतिहासिक संवेदनासँग जोडेको स्थानीयको भनाइ छ । उनले मधेश आन्दोलनको मर्मलाई आत्मसात् गर्दै जनताको अधिकार र सम्मानका लागि निरन्तर आवाज उठाउने प्रतिबद्धता दोहोर्याए ।
प्रतिक्रिया दिनुहोस् !