वीरगंज (पर्सा), १८ माघ । पर्सा क्षेत्र नम्बर–१ मा जनमत पार्टीका उम्मेदवार ओमप्रकाश सरार्फले वीरगन्ज महानगरपालिका वडा नम्बर–१८ को भवानीपुर, इनर्वा तथा वडा नम्बर–२२ जगरनाथपुरमा भेटघाट, संवाद र घरदैलो कार्यक्रम सम्पन्न गरेका छन् । स्थानीय बासिन्दासँग प्रत्यक्ष भेटघाट गर्दै सरार्फले क्षेत्रका समस्या, अपेक्षा र सुझाव सुनेका थिए ।
कार्यक्रमका क्रममा उनले मधेससँग जोडिएका मुद्दा, विकास, सुशासन र जनप्रतिनिधिको जवाफदेहिताबारे धारणा राखे । सरार्फले विगतका आन्दोलनहरूका प्रसंग उठाउँदै नागरिक अधिकार, न्याय र उत्तरदायित्वका विषयमा मतदातासँग संवाद गरेका थिए । ‘जनताको मत नै परिवर्तनको बलियो माध्यम हो,’ उनले भने, ‘अब मतदाताले आफ्नो निर्णयमार्फत जवाफदेही राजनीति रोज्नुपर्छ ।’
घरदैलोका क्रममा स्थानीयले सडक, खानेपानी, स्वास्थ्य सेवा, शिक्षा र रोजगारीजस्ता आधारभूत विषय उठाएका थिए । सरार्फले यी समस्याहरूलाई प्राथमिकतामा राख्दै समाधानमुखी पहल गर्ने प्रतिबद्धता व्यक्त गरे । उनले जनमत पार्टीले प्रस्तुत गरेको विकास र सुशासनको दृष्टिकोणबारे जानकारी गराउँदै मतदातालाई चुनाव चिन्हमा मतदान गर्न अपिल गरेका थिए ।
कार्यक्रममा पार्टीका विभिन्न तहका नेता तथा कार्यकर्ताहरूको सहभागिता रहेको थियो । सहभागीहरूले घरदैलो र संवादमार्फत मतदातासँग नजिकिने अभियानलाई निरन्तरता दिने बताएका छन् । स्थानीयसँगको प्रत्यक्ष संवादले चुनावी अभियानलाई थप प्रभावकारी बनाएको उनीहरूको भनाइ थियो ।
जनमत पार्टीका उम्मेदवार सरार्फले आगामी दिनमा पनि टोल–टोल पुगेर मतदातासँग भेटघाट गर्ने र स्थानीय मुद्दालाई प्राथमिकतामा राख्ने बताएका छन् । घरदैलो अभियानमार्फत मतदातासँग विश्वासको सम्बन्ध निर्माण गर्दै चुनावी गतिविधि अघि बढाइने उनको भनाइ छ ।
प्रतिक्रिया दिनुहोस् !