वीरगंज (पर्सा), १० माघ । पर्सा निर्वाचन क्षेत्र नं. १ अन्तर्गत वीरगंज महानगरपालिका वडा नं. १६ को नगवा दक्षिण टोलमा जनमत पार्टीको चुनावी कार्यक्रम सम्पन्न भएको छ । कार्यक्रममा युवा उम्मेदवार ओमप्रकाश सरार्फलाई स्थानीय बासिन्दाहरूले स्वागत गर्दै उत्साह प्रकट गरेका थिए ।
कार्यक्रमलाई सम्बोधन गर्दै उम्मेदवार सरार्फले नगवा र वीरगंज महानगरपालिका वडा नं. १६ लाई विगतमा नेताहरूले भोट बैंकका रूपमा मात्र प्रयोग गरेको आरोप लगाए । उनले नगवा तथा इनर्वा क्षेत्रलाई लामो समयसम्म विभेदमा राखेर अन्याय गरिएको दाबी गर्दै, त्यस अवस्थाको अन्त्य गर्न आफू चुनावी मैदानमा उत्रिएको स्पष्ट पारे ।
सरार्फले आफ्नो चुनाव चिन्ह ‘हरन’ छापमा मतदान गरी विजयी गराए वडा नं. १६ को कायापलट गर्ने प्रतिबद्धता व्यक्त गरे । आफू राजनीति तथा सामाजिक गतिविधिमा सक्रिय युवा भएको उल्लेख गर्दै युवाको उत्थानका लागि निरन्तर संघर्षरत रहेको र जेन–जी पुस्ताको प्रतिनिधित्व गर्ने उम्मेदवारका रूपमा आफूलाई अघि सारे ।
अन्य उम्मेदवारहरू अन्योलमा रहेका बेला आफू भने निरन्तर घरदैलो अभियान र निर्वाचन लक्षित कार्यक्रममै केन्द्रित रहेको उनले बताए । जनमत पार्टीका बुथ इन्चार्ज किरण चौर्सियाको अध्यक्षतामा सम्पन्न उक्त कार्यक्रममा पार्टी नेता विद्यालाल प्रसाद, निराजन कुशवाहा, भुपेन्द्र साह, सत्युह साह, सहनवाज राकीलगायत स्थानीयवासीहरूको उल्लेखनीय सहभागिता रहेको थियो ।
प्रतिक्रिया दिनुहोस् !