कलैया (बारा), २५ पुस । बारा प्रहरीले अवैध लागूऔषध अफिमसहित तीन जनालाई पक्राउ गरेको छ । बिहीबार अपरान्ह इलाका प्रहरी कार्यालय प्रसौनीबाट खटिएको प्रहरी टोलीले नियमित सवारी चेकजाँचका क्रममा कारबाट ठूलो परिमाणमा अफिम बरामद गरेपछि चालकसहित तीन जनालाई नियन्त्रणमा लिएको हो ।
जिल्ला प्रहरी कार्यालय बाराका अनुसार प्रसौनी गाउँपालिका–१ नकटुवास्थित पतञ्जलीबाट नकटुवातर्फ जाँदै गरेको बीआर ०१ सीएल ६०७९ नम्बरको कार रोकी जाँच गर्ने क्रममा कारको पछाडिको सिटमाथि राखिएको कालो प्लास्टिकको झोलाभित्र लुकाइ राखिएको अफिम फेला परेको थियो । तौल गर्दा उक्त अफिम २ किलो २४ ग्राम रहेको प्रहरीले जनाएको छ ।
पक्राउ पर्नेहरूमा पर्साको बहुदरमाई नगरपालिका वडा नम्बर ७ का ३८ वर्षीय निलेश पटेल कुर्मी, वीरगंज महानगरपालिका वडा नम्बर ११ का ३२ वर्षीय जौवाद अहमद तथा पर्साकै बिन्दवासिनी गाउँपालिका वडा नम्बर २ का ४८ वर्षीय शेषनाथ चौरसिया रहेका छन् ।
प्रहरीका अनुसार प्रारम्भिक अनुसन्धानमा उनीहरू लागूऔषध ओसारपसारमा संलग्न रहेको आशंका गरिएको छ । बरामद अफिम र प्रयोग गरिएको कार समेत नियन्त्रणमा लिइएको र घटनाबारे थप अनुसन्धान भइरहेको जिल्ला प्रहरी कार्यालय बाराले जानकारी दिएको छ । पक्राउ परेकाहरूमाथि लागूऔषध नियन्त्रण ऐन अन्तर्गत मुद्दा दर्ता गरी आवश्यक कानुनी प्रक्रिया अगाडि बढाइएको प्रहरीले जनाएको छ । 
प्रतिक्रिया दिनुहोस् !