वीरगंज (पर्सा), २२ पुस । वीरगंज महानगर क्षेत्रमा दुई समुदायबीच उत्पन्न तनावका कारण कर्फ्यु आदेश लागू भएपछि सम्पूर्ण विद्यालयहरू बन्द हुन पुगेका छन् । यसबाट विद्यार्थीहरूको पठनपाठन पूर्ण रूपमा अवरुद्ध भएको भन्दै राष्ट्रिय निजी तथा आवासीय विद्यालय एसोसिएसन नेपाल (नेशनल प्याब्सन) वीरगञ्ज महानगर समितिले सामाजिक शान्ति, सद्भाव र शिक्षा क्षेत्रको संरक्षणका लागि गम्भीर अपिल गरेको छ ।
नेशनल प्याब्सन वीरगञ्जका सचिव शेख अजहरले जारी गरेको प्रेस विज्ञप्तिमा वर्तमान तनावपूर्ण अवस्थाले नगरको शान्ति, सद्भाव र सामाजिक सहअस्तित्वमा गहिरो असर पारेको उल्लेख गरिएको छ । कर्फ्युका कारण विद्यालय सञ्चालन ठप्प हुँदा विद्यार्थीहरूको शैक्षिक गतिविधिमा गम्भीर प्रभाव परेको भन्दै संगठनले चिन्ता व्यक्त गरेको छ ।
विज्ञप्तिमा यसअघि पनि बारम्बार लाग्ने बिदा, राजनीतिक आन्दोलन तथा अन्य गतिविधिहरूका कारण विद्यालय सञ्चालन प्रभावित हुँदै आएको सन्दर्भ उल्लेख गरिएको छ । यसले विद्यार्थीहरूको शैक्षिक स्तर र मानसिक स्वास्थ्यमा नकारात्मक असर पारिरहेकोप्रति संगठनले गहिरो चिन्ता व्यक्त गरेको छ ।
विज्ञप्तिमा भनिएको छ, “हाम्रा बालबालिका कुनै पनि आन्दोलन वा द्वन्द्वका जिम्मेवार होइनन् । उनीहरू नै समाज र राष्ट्रको भविष्य निर्माण गर्ने आधार स्तम्भ हुन् ।” नेशनल प्याब्सनले कुनै पनि आन्दोलन वा कार्यक्रम अघि बढाउँदा बालबालिकाको भविष्य र शिक्षा क्षेत्रमा पर्ने प्रभावबारे गम्भीरतापूर्वक सोच्न सम्पूर्ण सरोकारवालाहरूलाई आग्रह गरेको छ ।
साथै, वीरगञ्ज महानगरपालिकाका नगरप्रमुख, पर्साका प्रमुख जिल्ला अधिकारी तथा राजनीतिक दलका नेतृत्वलाई आपसी मतभेदका बाबजुद शिक्षा क्षेत्र थप प्रभावित नहोस् भन्ने विषयमा विशेष संवेदनशीलता अपनाउन विनम्र अनुरोध गरिएको छ । निरन्तर विद्यालय बन्द हुने अवस्था कायम रहे भविष्यमा अभिभावकहरू वीरगञ्जका विद्यालयमा आफ्ना बालबालिकालाई भर्ना गर्न हिच्किचाउने र यसले सहरको शैक्षिक छविमा नकारात्मक असर पार्ने चेतावनीसमेत विज्ञप्तिमा दिइएको छ । 
प्रतिक्रिया दिनुहोस् !