वीरगंज (पर्सा), ३० असोज । वीरगंज भन्सार यात्रु शाखामा कागजात नभएका भारतीय गाडीहरुको पनि भन्सार काट्ने गरेको घटना बाहिरिएको छ । भन्सार स्थित सशस्त्र प्रहरी डिएसपी देबेन्द्र सिंहका ड्राइभर धर्मेन्द्र राउत र भन्सार अधिकृतको मिलोमतोमा १० देखि २० हजार रुपैयासम्म असुली गरि कागजात विनाको भारतीय गाडीको भन्सार गराउने गरेको पाइएको हो । एम.एच. ३० बि.एल. ३३६३, एम.एच. २७ बि.भि. ३३९९, डब्लु.बि.०६ यु.०१०० नम्बरको भारतीय गाडी कागजात विना भन्सार गराई नेपाल प्रवेश गरेको छ ।
भन्सार यात्रु शाखाका घुम्ने गरेका केही दलालहरुले सशस्त्र प्रहरी एवं भन्सार अधिकृतको मिलोमतोमा कागजात विनाकै गाडीहरुको पाँच गुणासम्म बढि रकम लिएर भन्सार कटाउने गरेका छन् । उल्लेखित नम्बरहरुको भारतीय गाडीको रक्सौलबाट नक्कली कागजात बनाई भन्सार अधिकृतलाई मिलाई १० देखि २० हजार रुपैयासम्म लिएर भन्सार कटाउने गरेका छन् । एम.एच. नम्बरको दुईवटा गाडीको पाँच दिनको भन्सार कटाउन दलालले १६ हजार रुपैया लिएका थिए, जसमध्ये डिएसपीका ड्राइभर धर्मेन्द्र राउतले ३ हजार बुझेका थिए । यसैगरि डब्लु.बि. नम्बरको गाडीलाई १० दिनको भन्सार गराउन २० हजार रुपैया बुझेका थिए । यसबाट पनि डिएसपीका डाइभर धर्मेन्द्रले पनि पैसा बाँडेका थिए ।
एउटा भारतीय गाडीको ५ दिनको भन्सार गराउन ३ हजार रुपैया लाग्नुपर्ने ठाउँमा दलालहरुले ८ हजार रुपैया बुझेका छन् । यसैगरि अर्का वेस्ट बंगालको गाडीलाई १० दिनको भन्सार गराउन ६ हजार लाग्नुपर्नेमा कागज नभएकै कारण २० हजार रुपैया दलालले बुझेका छन् । यसरी भारतीय नम्बरको गाडीबाट भन्सार गराउने नाममा दलालहरुले हजारौ लुट्ने गरेका छन् भने ति दलालहरुबाट सशस्त्र प्रहरी र भन्सार अधिकृतले बाँडीचुँडी रकम लिने गरेको भन्सारकै एक कर्मचारीले जानकारी दिएका छन् ।
कागजात विना भन्सार काटेर नेपाल प्रवेश गरेको वेस्ट वंगालको थार गाडीलाई मकवानपुरको रातोमाटो स्थित ट्राफिक प्रहरीले समातेको थियो । तर भन्सारको कागज भएको कारण दुई तीन घण्टा रोकेर छाडिएको थियो । यसरी वीरगंज भन्सार यात्रु शाखाका अधिकृत र सशस्त्र प्रहरीको मिलोमतोमा कागजात विनाको भारतीय नम्बरको गाडीको भन्सार काटिने गरेको रहस्य बाहिरिएको थियो । यो त उदाहारण मात्रै हुन्, दिनहुँ यस्ता कागजात विनाको सयौं गाडीबाट दलालले १० देखि २० हजार रुपैया असुली भन्सार कटाउने गरेको बताइएको छ ।
विगत एक हप्तादेखि वीरगंज भन्सार कार्यालय यात्रु शाखाबाट कागजात विना गाडीहरु भन्सार भइरहेको भन्ने सूचना भन्सार प्रमुखलाई दिदाँ पनि कुनै किसिमको कारवाही गरेका छैनन् । यसबाट भन्सार प्रमुखको पनि मिलोमतो रहेको पुष्टि हुन्छ । दशैंको बखत तस्करसँग रकम असुली गर्न नपाएका सशस्त्र प्रहरी अब भन्सार गराउने गाडीहरुबाट असुली गरि रहेको हो । दलालहरुलाई संरक्षण गर्न र भन्सार गराउनमा सहज वातावरण बनाईदिन सशस्त्र प्रहरी डिएसपीका ड्राइभर धर्मेन्द्रले असुली गर्ने गरेका छन् । डिएसपीलाई पैसा दिनुपर्छ भनेर उक्त रकम असुल्ने गरेको भन्सारका एक दलालले बताएका छन् । 
प्रतिक्रिया दिनुहोस् !