• मुस्कान श्रेष्ठ
वीरगंज (पर्सा), २३ असोज । पर्सामा पछिल्लो समय गम्भीर प्रकृतिका अपराधिक घटना बढ्दै गएको छ । खुल्ला सिमाका कारण लागुऔषध ओसारपोसारदेखि चोरी, तस्करीलगायत विभिन्न अपराधिक घटना वृद्धि हुँदै गएको हो । पछिल्लो १ महिनाको अवधिमा ७ वटा शव बरामद हुनुले जिल्लाको शान्ति सुरक्षामा चुनौति थपिएको छ ।
पर्सामा बढ्दै गएको अपराधका घटनाहरुले पछिल्लो समय जिल्लामा शान्ति सुरक्षा चुनौतिपूणर् बन्दै गएको छ । गत भदौ १३ गते देखि असोज १९ गतेसम्म एक महिनाको अवधिका पर्सामा ७ वटा शव फेला परेको छ । जसमध्ये ३ जनाको विभत्स तरिकाले हत्या गरिएको छ । गत भदौ १३ गते पर्साको जिराभवानी गाउपालिकाको इमिर्ती खोलामा अन्दाजी २४/२५ वर्षीय युवतीको टाउको र शरीर छुटिएको अवस्थामा छुट्टाछुटै स्थानमा शव फेला परेको थियो भने भदौ २५ गते ठोरीको विजयवस्तीमा एक ४० बर्षीय पुरुषको हत्या गरि फालिएको अवस्थामा शव फेला परेको थियो ।
त्यस्तै असोज २ गते पर्साकै जगरनाथपुर गाउँपालिकामा ५० बर्षीय एकल महिला शान्ति देवी विनको घाँटी रेटी हत्या गरिएको अवस्थामा शव बरामद भएको थियो । घटनाको दुई दिनमै गत असोज ४ गते वीरगंजको पानगल्लीमा ५० बर्षीय भुब्रो महतो नुनियाको शव फेला परेको थियो । त्यसै दिन वीरगंजको छपकैयामा वारा जिल्ला कलैया निवासी अरविन्दकुमार सर्राफको हत्या गरिएको अवस्थामा शव बरामद भएको थियो ।
गत असोज १३ गते पर्साको विन्दवासिनी गाउँपालिकामा ढोङ्गही खोलामा एक महिलाको हत्या गरी फालेको अवस्थामा शव फेला परेको भने असोज १८ गते वीरगंज महानगरपालिका वडा नम्बर १ छपकैयामा ४० बर्षीया महिला पुनम देवीको घरमै हत्या भएको थियो । यी ७ वटा घटनाहरु मध्ये प्रहरीले २ वटाको अनुसन्धानलाई टुँगो लगाई अभियुक्तलाई सार्वजनिक गरिसकेको छ भने जिराभवानीमा भएको महिलाको हत्याबारे प्रहरीको अनुसन्धान असफल रहेको छ । अहिलेसम्म ति महिलाको पहिचान समेत हुन सकेको छैन ।
छपकैयामा घरमै महिलाको हत्या भएको घटनामा प्रहरीले अभियुक्तलाई पक्राउ गरि सार्वजनिक गरिसकेको छ भने जगरनाथपुरमा भएको महिला हत्यामा पनि संलग्नलाई पक्राउ गरि सार्वजनिक गरि सकेको छ । समग्रमा भन्दा दुईवटा महिलाको हत्यामा चोरीको पोल खुल्ने डरले हत्या गरिएको अनुसन्धानबाट खुलेको छ भने गम्भिर प्रकृत्तिका हत्याको टुँगो लाग्न सकेको छैन । एक महिनाको अवधिमा लगातार हत्या हुनुले पनि जिल्लामा शान्ति सुरक्षामा चुनौती थपिएको बुझ्न सकिन्छ ।
यति मात्र होईन, गत असोज १२ गते ९ जना प्रहरीको कडा सुरक्षा व्यवस्थाबीच वीरगंज वीर्ता स्थित बाल सुधारगृहको छतबाट हामफालेर २ जना बाल कैदीबन्दी फरार भए । घटनाको ४८ घण्टापछि एक जनालाई सर्लाही र अर्कालाई नेपाल भारतको नाकाबाट प्रहरीले नियन्त्रणमा लिएको थियो । फरार बाल कैदीबन्दी प्रकरणमा अनुसन्धान गर्नका लागि पर्साका प्रहरी नायब उपरीक्षक ध्रुवबहादुर श्रेष्ठको नेतृत्वमा तीन सदस्यीय छानविन समिति गठन गरेको छ ।
त्यस्तै गत असोज १३ गते वीरगंजको आर्कषणको केन्द्रविन्दु रहेको घण्टाघरमा जडान गरिएको बत्तीहरु तोडफोड गरियो । वीरगंज महानगरपालिकाको नगर सौन्दर्यकरण गर्ने अभियान अन्तर्गत जडान गरिएको बत्ती चोरी गर्नुका साथै तोडफोड गरियो । प्रहरीले चोरी र तोडफोडको आरोपमा १ भारतीय सहित २ जना युवकलाई पक्राउ गरिसकेको छ । तर, घण्टाघरकै छेउमै रहेको प्रहरी बिटमा २४ घण्टा खटिने प्रहरीको उपस्थितिमा नै उत्श्रृङ्खल क्रियाकलाप हुनुमा प्रहरी प्रशासनको गम्भीर लापरवाही भएको भन्दै चौतर्फी आलोचना भयो । यसरी १ पछि अर्को आपराधिक घटनाहरु हुनुले जिल्लामा सुरक्षा व्यवस्था फितलो भएको स्थानीयहरुले महसुन गर्न थालेका छन् ।
यता जिल्ला प्रहरी कार्यालय पर्साका प्रहरी उपरीक्षक कोमल शाहले एक महिनाको अवधिमा भएका केही घटनाहरु संयोग मात्रै रहेको बताएका छन् । उनले समाजमा अपराधिक घटनाहरु भइनै रहन्छन्, प्रहरी सुरक्षाको लागि खटेका हुन्छन्, तर घरमा घटनाहरु भइ नै रहन्छ, अनुसन्धान कसरी भयो ? अनुसन्धानमा प्रहरी कहाँ चुक्यो ? त्यो खोजविनको विषय रहेको भन्दै यहाँ भएका घटनाहरुको अनुसन्धानमा प्रहरी सफल रहेको दाबी गरे ।
उनले जिल्लाको शान्ति सुरक्षा कडा एवं चुस्त दुरुस्त रहेको भन्दै विभिन्न कारणले घटनाहरु हुनसक्ने भएकोले जिल्लाको शान्ति सुरक्षा नै कमजोर भएको भन्न नमिल्ने बताए । शव बरामद भएकाहरुमध्ये कतिपयले हृदयघाट, विभिन्न समस्याबाट पनि मृत्यु भएकोले सबै अपराधिक घटना नै नभएको बताए । उनले जिल्लामा शान्ति कायम राख्न आफूहरु दृढ रहेको पनि दाबी गरे । पछिल्लोे समय जिल्लामा भएका विभिन्न आपराधिकदेखि साम्प्रदायिकसम्मको घटनाले सर्वसाधारण त्रसित छन् । सुरक्षा व्यवस्थाकोबीचमा केहि घटनाहरु पक्कै पनि स्वभाविक हो तर १ महिनाको अवधिमा यतीधेरै घटनाले पर्सा प्रहरीको सुरक्षाा व्यवस्थामा प्रश्न चिन्ह भने पक्कै खडा गरेको छ । यसतर्फ प्रहरी प्रशासन गम्भीर हुुनुपर्ने देखिएको छ । 
प्रतिक्रिया दिनुहोस् !