• हरिशंकर शर्मा
कलैया (बारा), १० असोज । जिल्ला प्रहरी कार्यालय बाराले मातहतमा कार्यरत प्रहरी सहायक निरीक्षकहरुको हेरफेर गरेको छ । प्रहरी नायब उपरीक्षक दधिराम न्यौपानेले असोज ७ गते सूचना जारी गर्दै प्रसनिहरुको हेरफेर गरेका हुन् । उनले विश्वासिलो पात्र प्रसनिहरुलाई सिमा क्षेत्रको इन्चार्जमा खटाएका छन् भने अन्यलाई मातहतमा खटाएका हुन् । पहिलादेखि नै चौकी इन्चार्ज रहेका एवं जिल्लामा रहेका प्रसनिहरुमध्ये विश्वासिलो पात्र प्रसनिहरु पुनः इन्चार्जको जिम्मेवारी पाएका छन् भने अन्यले मातहतका जिम्मेवारी पाएका हुन् ।
नजिकिँदै गएको दशैंको मुखमा आएर युनिट इन्चार्जलाई हेरफेर गर्नुले डिएसपी न्यौपाने नेपाल भारत सिमा क्षेत्रमा हुने गरेको चोरी, पैठारी एवं तस्करहरुबाट रकम आर्थिक लाभ हुने मनसायले विश्वासिलो पात्रलाई चौकी इन्चार्ज पठाएको चर्चा हुन थालेको प्रहरी श्रोतले जनाएको छ । पहिलादेखि नै चौकी इन्चार्ज बसेका प्रसनिमध्ये आर्थिक लाभ दिन सक्नेलाई पुनः अर्को प्रहरी चौकी इन्चार्जमा नै खटाइएको छ भने अन्यलाई जिल्ला प्रहरी कार्यालय एवं इलाका प्रहरी कार्यालय मातहतमा काज खटाइएको बताइएको छ ।
इलाका प्रहरी कार्यालय चितलाङ्ग मकवानपुर (सञ्चार) मा दरबन्दी रही जिल्ला प्रहरी कार्यालय बारामा कार्यरत प्रसनि विष्णु प्रसाद लोहनीलाई डिएसपी न्यौपानेले प्रहरी चौकी बड्की फुलवरिया (बारा) का इन्चार्ज पठाएका छन् भने त्यहाँ कार्यरत प्रसनि उमश प्रसाद साहलाई जिल्ला प्रहरी कार्यालय बारामा काज खटाइएको छ । अस्थायी प्रहरी पोष्ट बसपार्क बारामा कार्यरत रहेका प्रसनि मौजीलाल साह कानुलाई प्रहरी चौकी तेलकुवाँका इन्चार्ज पठाइएको छ भने त्यहाँ कार्यरत रुपेश कुमार द्विवेदीलाई अस्थायी प्रहरी पोष्ट बसपार्कमा पठाइएको छ ।
त्यसैगरि इलाका प्रहरी कार्यालय सिमरामा कार्यरत प्रसनि मेकबहादुर श्रेष्ठलाई अस्थायी प्रहरी पोष्ट पथलावाघाटामा पठाइएको छ भने त्यहाँ कार्यरत सुजित कुमार सिंहलाई प्रहरी चौकी पथलैयामा पठाइएको छ । इलाका प्रहरी कार्यालय महेन्द्रआदर्शमा कार्यरत जगमोहन प्रसाद कानुलाई इलाका प्रहरी कार्यालय सिहोर्वामा काज खटाइएको छ भने त्यहाँ कार्यरत रामसकल महतोलाई इलाका प्रहरी कार्यालय सिमरामा पठाइएको छ । इलाका प्रहरी कार्यालय प्रसौनीमा कार्यरत सुरेन्द्र प्रसाद यादवलाई अस्थायी प्रहरी पोष्ट झुरझुरेको इन्चार्ज पठाइएको छ भने त्यहाँ कार्यरत महम्मद राउत हुसेन गद्दीलाई इलाका प्रहरी कार्यालय प्रसौनीमा पठाइएको छ ।
यसैगरि जिल्ला प्रहरी कार्यालय बारामा कार्यरत महम्मद जुलाई अलिलाई प्रहरी चौकी श्रीनगर बैरियाको इन्चार्ज पठाइएको छ भने त्यहाँ कार्यरत राजिव कुमार सिंहलाई इलाका प्रहरी कार्यालय सिम्रौनगढमा पठाइएको छ । जिल्ला प्रहरी कार्यालयमा कार्यरत रामनरेश प्रसाद यादवलाई प्रहरी चौकी बेल्दारीको इन्चार्ज पठाइएको छ भने त्यहाँ कार्यरत मानबहादुर कार्कीलाई इलाका प्रहरी कार्यालय सिमरामा पठाइएको छ । जिल्ला प्रहरी कार्यालयमा कार्यरत अनिल कुमार पटेललाई अस्थायी प्रहरी पोष्ट लङ्गडाचोकमा पठाइएको छ भने त्यहाँ कार्यरत अरुण कुमार महतोलाई जिल्ला प्रहरी कार्यालयमा पठाइएको छ ।
जिल्ला प्रहरी कार्यालय बारामा कार्यरत सिताराम चौधरीलाई जि.अ.स.तथा सु.प्र.ई.मा पठाइएको छ भने त्यहाँ कार्यरत रामप्रवेश प्रसाद पटेललाई इलाका प्रहरी कार्यालय सिमरामा काज खटाइएको छ । इलाका प्रहरी कार्यालय सिम्रौनगढमा कार्यरत उमेश कुमार राउतलाई जिल्ला प्रहरी कार्यालय पठाइएको छ भने त्यहाँ कार्यरत सुरेश प्रसाद यादवलाई इलाका प्रहरी कार्यालय निजगढमा काज खटाइएको छ ।
प्रतिक्रिया दिनुहोस् !