• मुस्कान श्रेष्ठ
वीरगंज (पर्सा), १६ भदौ । वीरगञ्जमा आज नेवार समूदायले सापारु अर्थात गईजात्रा पर्व धुमधामका साथ मनाएका छन् ।
एक वर्ष भित्र दिवंगत भएका परिवारका सदस्यको सम्झनामा गाईजात्रा निकाल्ने प्रचलन अनुरुप वीरगञ्ज सापारु समितिको आयोजनामा आज गाईजात्रा निकालिएको हो ।
वीरगञ्जस्थित अखत अतिथि सदनबाट निकालिएको जात्रा महाविरस्थान, माईस्थान मन्दिर, विर्ता हुँदै पुनः अतिथी सदनमा आएर समापन भएको थियो । दिवंगत आफन्तको सम्झनामा गाई वा मानिसलाई गाईको रुपमा सिँगारी आ–आफ्ना टोलमा परिक्रमा गराउने र उनीहरुलाई श्रद्धालुद्धारा दूध, फलफूल, रोटी, चिउरा दहीका साथै अन्न र द्रव्य दान गरिने चलन रहेको वीरगञ्ज सापारु समितिका अध्यक्ष सञ्जय जोशीले जानकारी दिनुभयो । यसले वर्ष भरी मृत्यु भएका व्यक्ति गाईको पुच्छर समाई वैतरणी पार हुने धार्मिक विश्वास रहेको उहाँले बताउनुभयो ।
मल्लकालीन राजा प्रताप मल्लले पुत्रशोकले विह्वल भएकी आफ्नी रानीलाई सहरका अन्य बासिन्दाले पनि यस्तै शोक बेहोरिरहेका छन् भन्ने देखाएर रानीको चित्त बुझाउन गाईजात्राको परम्परा थालेको इतिहासमा उल्लेख गरिएको नेवाः समूदायका बुद्धिजिवीहरुले बताएका छन् ।
प्रतिक्रिया दिनुहोस् !