• मुस्कान श्रेष्ठ
वीरगंज (पर्सा), ३० जेठ । अत्याधिक गर्मीका कारण लु लाग्ने सम्भावना प्रबल रहेको भन्दै डाक्टरहरुले प्रशस्त मात्रामा पानी पिउन सुझाव दिएका छन् । तर प्रचण्ड गर्मीका कारण जमिनमुनि पानीको सतह सुक्न थालेपछि पर्सा जिल्लामा धारामा पानी समेत आउन छाडेको छ । खानेपानी समस्याका कारण शरिरलाई आवश्यक पर्ने पानी पिउन सकेका छैनन् भने किनेर पिउनु पर्ने बाध्यता बढेको छ ।
पर्सा लगायत समग्र तराई क्षेत्रको अधिकतम तापक्रम उतकर्षमा पुगेको छ । जेठ पहिलो साता देखि जिल्लामा गर्मी बढ्नुका साथै पानीको श्रोत पनि सुक्दै गएको छ । जसकारण सर्वसाधारणको दैनिकी नराम्ररी प्रभावित भएको छ । तराई मधेशमा चापाकल नै खानेपानीको मुख्य श्रोत हो तर अहिले पर्साका ९५ प्रतिशत घरको धारा र चापाकल सुकेको अवस्था छ ।
जमिन मुनीको पानी सुकेपछि बीरगंज लागतय १४ वटै स्थानीय तहमा पानीको हाहाकार मच्चिएको छ । घरको धारा तथा चापाकल सुख्दा स्थानीयहरुले बिहान र रातको समयमा बोत्तल र बाल्टी लिएर पानी आउने ठाउँमा पुगी पानी भर्नुपर्ने बाध्यता छ । पानीको समस्या नहुने गरेको तराई क्षेत्रमा यसवर्ष उखरमाउलो गर्मी र पानी नपरेको हुनाले खानेपानीको संकट उत्पन्न भएको स्थानीयहरु बताउँछन् ।
चापाकलमा पानी आउन छाडेपछि स्थानीयहरु सरकारी धारा जडान गराउन आउन थालेको छ । नेपाल खानेपानी संस्थान शाखा कार्यालय वीरगञ्जले दैनिक १० घण्टामा ५० लाख लिटर भन्दा बढी पानी वितरण गर्ने गरेको छ । सरकारी धारा जडान गरेका ग्राहकलाई पानीको समस्या नरहेको नेपाल खानेपानी संस्थानका प्रमुख निरण महर्जनले बताएका छन् ।
जलवायु परिवर्तनका साथै जतात्यतै चापाकल जडान गरि चरम दोहन भएको कारण पनि सतहको पानी सुक्दै गएको प्रमुख महर्जनको भनाई छ । खोनपानीको समस्या भएपछि विभिन्न संघसंस्थाहरुले बोटोमा हिड्ने बटुवाहरुलाई जुस र पानी जस्ता पेय पदार्थ वितरण गरिरहेका छन् ।
पानीको समस्या समाधान गर्न बीरगञ्ज महानगरपालिकाले विभिन्न वडामा निःशूल्क रुपमा धारा जडान गर्दैछ । नेपाल खानेपानी संस्थानसँग समन्वय गरेर गरिब तथा विपपन्न वर्गलाई प्राथमिकतामा राखी करिब ४ हजार घरधुरीमा निःशुल्क धारा जडान गर्न लाागिएको वीरगञ्ज महानगरपालिकाका नगर प्रमुख राजेशमान सिंहले जानकारी दिएका छन् ।
वन जंगल विनास, चुरे दोहनको कारण वातावरणमा परेको प्रतिकुल असरका कारण तराई क्षेत्रमा अत्याधिक गर्मी बढेको स्थानीय बुद्धिजिवीहरु बताउँछन् । रुख विरुवा रोप्ने र चुरे संरक्षणमा जोड नदिए आगामी दिनहरुमा यसले अझै विकराल रुप लिन सक्ने भन्दै चिन्ता व्यक्त गर्न थालेका छन् ।
प्रतिक्रिया दिनुहोस् !